RIHA - Rojbûna Rêberê Gelê Kurd Abdullah Ocalan li gundê wî Amarayê ku lê ji dayik bûye bi girseyî bi dirûşma “Bijî Serok Apo” hat pîrozkirin.

 

Bi boneya 76’emîn rojbûna Rêberê Gelê Kurd Abdullah Ocalan bi dirûşma “Bi Civaka Demokratîk em ber bi azadiyê ve dimeşin” li gundê Amara yê ser bi navçeya Xelfetî ya Rihayê ve ji aliyê partiyên siyasî û saziyên demokratîk ve pîrozbahî hat lidarxistin. Girseyê xwe gihandin mala ku Abdullah Ocalan lê ji dayik bûyê û li vir pîrozbahî li dar xistin.

 

Girse dema gihîşt gundê Amarayê, posterê mezin ê Abdullah Ocalan ku roja 27ê Sibatê li Girtîgeha Îmraliyê hatibû kişandin rakir û bi berzkirina dirûşmeyên, “Rojbûna te pîroz be ey Serok Apo”, “Bijî Serok Apo”, “Dinyayeke bê Ocalan em ê bi ser wê de hilweşînin” , “Şehîd namirin”, “Ciwan fedayiyên Rêber Apo ne” ketin hewşa mala Abdullah Ocalan kul ê dayik bûye. Li malê Mehmet Ocalan û Omer Ocalan û xizmên Abdullah Ocalan, girseyê pêşwazî kirin.

 

Piştre girse derbasî hûndirê malê bû û li vir dirûşme hatin berzkirin. Her wiha ciwanan jî wêneyê mezin ê Abdullah Ocalan li banê xanî daliqandin. Ciwanan demek dirêj li ser banê xanî dirûşm berz kirin û piştre jî li hewşa malê panelek hat lidarxistin.

 

‘Serok dibêje divê ciwan hişyar bin’

 

Di panelê de ewilî Mehmet Ocalan axivî û bi xêr hatina mevanan kir. Mehmet Ocalan wiha got: “Serok di hevdîtina dawî de silavên xwe ji gel re û ji ciwanan re şand. Serok dibêje, ‘Divê ciwan ji provakasyonan re hişyar bin. Rêya me rêya dirêj e’. Bi aqilekî baş pirsgirêk dikare çareser bibe. Yê ku vê pirsgirêkê çareser bike jî Serok e. Rojbûna Serok pîroz be. Em spasiya hemû kesî dikin û mala we hemûyan ava.”

 

Endama Koma Aştiyê Avesta Gulîstan Uçar jî wiha axivî: “Çend roj in meşa me berdewam dike. Heta azadiya fizîkî ya Serokê me pêk were meşa me wê bidome. Em rojbûna Serok Apo weke rojbûna mirovahiyê dibînin. Jin û ciwan bîrdoziya birêz Abdullah Ocalan esas digirin. Em jî weke jin û ciwanan bi vê yekê serbilind in ku rêwiyê vê dozê ne.”

 

Bîranînên xwe yên bi Abdullah Ocalan re anî ziman

 

Rojnamevan-nivîskar Haydar Ergul ku hevalê Abdullah Ocalan e jî bîranînên xwe yên bi Abdullah Ocalan re anîn ziman û wiha got: “Hatina li vir pir bi watedar e. Di dîroka hemû civakan de kesayetên girîng hene. Di dîroka Kurd de jî kesayetên wisa derketine. Lê piştî sed salan di meha Nîsanê de keseyetekî wek Serokatî ji dayik bûye. Serokbûyîn ne karekî hêsan e. Hele ku li Kurdistanê avakirina partiyeke û meşandina doza azadiyê qet û qet ne hêsan e. Ne weke îro bû. Wê demê Kurdbûyîn wekî ‘heqaret’ didîtin. Lê niha ne wisa ye Serokatî keseyetekî mezin e.”

 

Piştrê jî Haydar Ergul di berdewamiya axaftina xwe bîranînên xwe yên li gel Abdullah Ocalan domand. Haydar Ergul qala pêvajoya komploya navneteweyî jî kir û destnîşan kir ku pêvajoya Romayê di jiyana wî de pêvajoya herî dijwar bûye.

 

Piştî axaftina Haydar Ergul panel bi pirs û bersivan bi dawî bû. Piştî panelê li hewşa xanî bi berzkirina dirûşmeyan bernameya pîrozbahiye bi dawî bû.