Mîdye Miqted

 

HELEB - Jinên li Helebê têkildarî peymana di navbera Desthilata Şamê û Meclisa Giştî ya taxên Şêx Meqsûd û Eşrefiyê dan zanîn wê av peyman bibe sedema çareseriya aloziyan û wiha gotin:"Wê ev peyman bibe misogeriya pêkanîna demokratikbûnê."

 

Ji destpêka aloziya Sûriyeyê taxên Şêx Meqsûd û Eşrefiyê yên bajarê Helebê di nava gef û şeran re derbas dibe her wiha bi hilweşîna rêjîma Baas'ê jî û ketina HTŞ'ê ya nava gelek deverên Sûriyeyê û di nav de Helebê dîsa ev taxên berxwedêr bi gefxwarinê rû bi rû man. Lê bi berxwdana gel û di serî de bi berxwedana jinan li Helebê peymana di navbera Desthilata Şamê û Meclisa Giştî ya taxên Şêx Meqsûd û Eşrefiyê hat îmzekirin. 

 

Li ser vê mijarê Hevseroka Giştî ya herdu Taxên Şêx Meqsûd û Eşrefiyê yên bajarê Helebê Hêvîn Silêman axaftin kir. Hêvîn Silêman wiha got:"

Wê pêkanîna peyman û destûrên bi destê jinê bibe kilîta çareserkirina aloziya Sûriyeyê. Bi salan e aloziya Sûriyeyê dewam dike."

 

'Peyman li ser bingeha çareserkirina aloziyê ye'

 

Hevseroka giştî ya her du taxên Şêx Meqsûd û Eşrefiyê ya bajarê Helebê Hêvîn Silêman têkildarî hevpeymanê wiha got:" Di van demên dawî de li Rojavayê Kurdistanê guhertinên siyasî yên pir bi lez hatin qewimîn. Ya herî bi bandortir jî banga 'Aştî û civaka demokratik' a Rêber Abdullah Ocalan e ku bandorê li ser pêkanîna rojevên heyî kir. Her wiha îmzekirina hin peymanên di navbera Mazlûm Abdî û Rêveberiya HTŞ'ê de û herî dawî peymana ku wê bibe kilîta çareserkirina aloziya Sûriyeyê ya di navbera Deshilatdariya Şamê û Meclisa Taxên Şêx Meqsûd û Eşrefiyê ya bajarê Helebê gelekî girîng in. Ev her du peyman li ser esasê sekinandina rijandina xwînê û dawîanîna li aloziya Sûriyeyê. Bi salan e aloziya Sûriyeyê dewam dike."

 

Ev peyman taybetiyên van taxan weke xwe dihêle

 

Di dirêjiya nirxandina xwe de wiha Hêvînê got:"Taxên Şêxmeqsûd û Eşrefiyê di nava hemû taxên Helebê de ku ji destpêka aloziya Sûriya yê zirar dîtin lê ya herî ku bûn warê berxwedaniyê û di şert û mercên herî giran de asta tekoşîna xwe li hember hemû çeteyan dan pêş,bi sedan nemir di van taxan de ji bo pêkanîna aştî hatin dayin,îro dem hatiye ku em va aloziyê çare bikin û dawî li van gefan bînin û bihêlin gel bi romet tir jiyan bikin ,îmzekirina va peymanê ji bo me gavek pir dîrokî bû,îro parastina van taxan desthiledariya Şamê  berpirsyare,her wiha ev peyman taybetiyên van taxan weke xwe dihêle."

 

'Yên bikaribin destûra nû ya Sûriyeyê bi rê ve bibin divê jin bin' 

 

Hêvîn Silêman bal bir ser hebûna jinan a di peymanê de û wiha pê de çû:" Ji bo me, weke jinên Şêx Meqsûs, ev gav gaveke girîng bû. Îro bi destê jinan, biryara Sûriyeyek nenavendî hat mohrkirin. Lewma ji bo tevahî jinên Sûriyeyê banga me heye ku têbikoşin û bibin cihê biryarê. Her wiha ji bo girtina rêya li ber hember hemû siyasetên înkar û qirkirinê hebûna jinan girîng e. Ji ber ku yên bûne pêşengê Şoreşa Rojava jin bûn. Her wiha yên ku bikaribin destûra nû ya Sûriyeyê bi rê ve bibin divê jin bin. Em ê li ser vê xalê kar û xebatên xwe bidin meşandin ji ber heta mafê jinan nîn be wê demokrasî neyê avakirin."

 

'Rola herî girîng a jinê ye'

 

Hêvîn Silêman da zanîn ku sîstema hevserokatiyê û demokratîkbûnê di vê peyamanê de xwe carek din îsbat kir û wiha got:"Piştî ku bi awayekî demokratîk ji aliyê me bi wan re peyman hat îmzekirin me carek din îradeya jin û sîstema hevseroketî û demokratîkbûnê derxist pêş. Îro di vê peymanê de heger rola jinê tune ba wê bi xwe re tu encamên erênî jî ava nekiriba."

 

'Wê pêşerojek xwedî têkoşîn li benda me be'

 

Hêvîn Silêman bi lêv kir ku bi vê peymanê wê gavên erênî di demên pêş de werin avêtin û wiha got:"Wê pêşerojek xweş, xwedî têkoşîn li benda me be her wiha wê gavên dîrokî dîsa bên avêtin. Em ê vê cejnê bikin cejna aştiyê her wiha gavên ku ji aliya jinê ve hatin avêtin bi misogerî wê dewam bikin. Em ê bi vê peymanê Sûriyeyek azad û demokratîk bidin avakirin."

 

Bi gavên jinan rizgarkirina Efrînê

 

Hêvîn Silêman da zanîn ew dixwazin demokratîkbûnê pêş bixin û wiha bi dawî kir:"Çawa ku me bi vê gavê nenavendîbûnê pergala li taxê pêk anî em ê ber bi vegera Efrînê ve gavên bi têkoşîna jinê bidin avêtin û li hemû deverên Sûriyeyê em demokratikbûnê bidin pêşxistin da ku em jiyana azad bidin misogerkirin."