NAVENDA NÛÇEYAN - Şêniyên Kobanê ji bo 4’ê Nîsanê rojbûna Rêberê Gelê Kurd Abdullah Ocalan dar çandin.

 

Her sal bi mebesta 4’ê Nîsanê Rojbûna Rêberê Gelê Kurd Abdullah Ocalan, li cîhên cûda dar tên çandin. Îsal jî li ‘Baxçeyê Serok Apo’ dar hatin çandin. Bi sedan kes beşdarî çandina daran bûn.

 

Di bin diruşmeya “4’ê Nîsanê vejîna jin û gelan e” li gundê Siftekê 600 dar hat çandin. Gava ku darên fistiq, gûz, berû hatin çandin, bê navber diruşma “Jin Jiyan Azadî” û “Bê Serok jiyan nabe” hatin berzkirin. Piştî çandina daran, Endama Kongra Star Hêvîn Mihyedîn daxuyaniyek da. Hêvîn bi bîr xist ku ji bo çandina daran kom bûne û wiha got: “Rojbûna Rêberê Gelê Kurd Abdullah Ocalan, em li şervanên me yên serê çiyan, li hemû hevalên me ku bi felsefeya Rêber Apo dijîn û li Rêber Apo pîroz dikin. Çandina daran ji bo Rêber Apo xwedî girîngiyek mezin e, lewma her sal ji bo roja 4’ê Nîsanê em daran datînin.”

 

‘Dewleta Tirk êrîşî xwezaya me dike’

 

Hêvîn Mihyedîn destnîşan kir her ku ew daran diçînin û welatê xwe dixemlînin, li kêlek vê yekê dewleta Tirk êrîşî xwezayê dike û xwezaya wan xerab dike. Hêvîn Mihyedîn bi van gotinan dawî li daxuyaniyê anî: “Em vê rojê li hemû malbatên şehîdan, li gelê Kurd ku her tim li ber xwe dide û li pey felsefeya Rêber Apo ye, Rojbûna Serok Apo li hemû gelê xwe pîroz dikin û em bi hêvî ne ku salên pêş, em bi serokê xwe re rojbûna wî pîroz bikin.”

 

Daxuyanî bi diruşma “Jin Jiyan Azadî” bidawî bû.