Elfazî Toral

 

STENBOL - Psîkiyatrîst Sabrîna Hackman û Dr. Llarîa Deî tecrîdê giranî yê Rayberê PKKyî Abdullah Ocalanî ser o ercna û wina vatî: “Ma derheqê rewşa Abdullah Ocalanî de endîşeyîn ê. Çîyê ke zîndanan de yenê kerdiş, benê sebebê endîşeyan. Seba pêro şaran ganî paştdayîşêk mîyanneteweyî bibo.”

 

Meclîsê Kongreya Demokratîke ya Şaran (HDK) bi armancê bale bianco Îmrali û tepişteyê sîyasîyan ser o 6ê teşrîna verêne de ‘komxebata weşîye ya zîndanan ê mîyanneteweyî’ pê ard. Wareyê mîyanneteweyî zî heyetêk sazgehê weşîye tewr bî. Komxebate di rojî dewam kerd û binpaykerdişê heqan ê Îmraliyî û pêro zîndananê bînî ameyî munaqeşekerdiş. Komxebate de mesajê awankerdişê tora têkoşînî vejîyayî vernî.

 

Psîkiyatrîst Sbrîna Hackman û Dr. Llarîa Derî ke tewrê komxebate bîyî, derheqê tecrîdê Abdullah Ocalan û binpaykerdişê heqanê zîndanan ser o qisey kerdî.

 

‘Ez seba rewşa Abdullah Ocalanî endîşeyîn a’

 

Psîkiyatrîsta Alman Sabrîna Hackman ke mexdurê îşkenceyî dir şuxilêna, dîyar kerd ke rêxistinê heqê merdiman de derheqê kesê ke îşkence vînayê de paştdayîşê psîkolojîk daya. Sabrîna da zanayîş ke aye seba rewşa tepişteyanê Tirkîya û rewşa Rayberê PKKyî Abdullah Ocalanî endîşeyîn a û wina vat: “Ma perspektîfêk psîkolojîk ra biewnê. Rewşa îzolasyonê sewîyeya şexsî de tesîrêk pîlî yê demderg keno. Bêşik rewşa îzolekerdişî tena nokteyê şexsî de tesîr nêkena. Hetê komelî de zî netîceya ci est ê. Eke  kesêk komelî ra bêro dûrvistiş, bi tecrîdkerdiş û agahî ci ra nêro girewtiş, nê netîceyê komelî zî vejeno werte.”

 

 

‘Wexto ke ez agêrî welatê xo ez o rastîyan vajî’

 

Dr. Llarîa Derî ya îtalyanije ke doktor a û Roma de xebatan kena, dîyar kerd ke aye organîzasyonê Ambulatory Populary  Romenest yê merkezê ey Roma de yo şuxilêna û wina vat: “Serê nameyê organîzasyonî tewrê komxebata weşîye zîndana ê mîyanneteweyî bîya. Ma keyeyê tepişteyan dir qisey kerd. Ma derheqê rewşa tepişteyanê nêweşan de agahî girewt. Me vîna ke cuya înan çiqas zehmet a. Ma zor û zehmetîyê ke tepişteyî ciwîyenê, keyeyê înan ra goşdarî kerd. Bi qasê tepişteyan, keyeyî zî tesîr benê. Keye û heskerdoxî travmayan ciwîyenê. Ma goşdarî kerd. Wexto ke ez agêrî welatê xo, nê tecrubeyan neql bikerî. Ganî paştdayîşêk mîyanneteweyî pê bîyarê.”