MERKEZÊ XEBERAN - Çalakîkerê heqê merdiman ê bajarê Sine pê hesnayî ke do weçînayîşê 12ine yê Parlamentoyê Îranî boykot bikerê. 

 

Çalakîkerê cinî yê pawitişê heqanê cinîyan ê bajarê Sine, vizêr bi eşkerayîşêke pê hesnayî ke weçînayîşê 12ine yê Parlamentoyê Îranî do boykot bikerê. Sewbîna venga pêroyê şaranê Îranî kerdî ke 11ê Adare de keyeyê xo de bimanê û weçînayîşî bi no hawa red bikerê û keyeyê xo ra nêvejê. 

 

Eynî eşkerayîye de wina ame vatiş: “Serewedarnayîşê ‘Jin, Jiyan, Azadî’ bedilnayîşêk pîl raşteyê sîyasî yê Îranî de viraşt. Coka ra ma sey cinîyê çalakîkerê Sine nê weçînayîşî qebul nêkenê. Çike sîstemê dewleta Îranî sîstemêk problemin o û mîyanê nê sîstemî de weçînayîş sembolik ê. Ma weçînayîşê sembolîkan nas nêkenê.”

 

Roja weçînayîşî yê 1ê Adare de ma do bi sloganê ‘Weçînayîşê sindoqan rê û dîktatorîye rê nê’ keyeyê xo ra nêvejê û biqîrê vajê: 

 

“Daliqnayîş rê nê 

 

Tepiştişê ke cîyayeyê fikrê sîyasî vera pê yenê rê nê 

 

Îqtîdarîyê îdeolojîk rê nê 

 

Binpaykerdişê heqanê merdiman rê nê 

 

Cîyayeyê cînsîyetî rê nê 

 

Dûrfînayîşê mamostayê wendiş û unîversîteye rê nê 

 

Pelçiqnayîşê wendekaran rê nê 

 

Pelçiqnayîşê karkeran rê nê 

 

Ma do keyeyê xo de bimanê ke nîşan bidê Têgêrayîşê Azadîya Cinîye ganî yo û aktîf o.” 

 

Ercayeyê vatişî yo ke Partîya Cuya Azade ya Kurdistanî (PJAK) derheqê weçînayîşê 1ê Adare yê Îranî de bi eşkerayîyêke pê hesnabî ke no weçînayîş vera amanc û metodê  “Jin, Jiyan û Azadî” de yo û venga her kesî kerdî ke nê weçînayîşan boykot bikerê.