Pelşîn Çetînkaya

 

AMED - Tirkiye û Kurdistan de seba polîtîkayê ke îqtîdaro camêrd pê ano, şîdetê cinîyan û tutan ser o zêde beno û şikdarî zî nînê muhakemekerdiş. Cinîyan derheqê polîtîkaya şîdetî û îqtîdarî de qisey kerdî û dîyar kerdî ke ê xo asayîş hîs nêkenê. Cinîyan vatî hemverê şîdetî de çareserî, rêxistinbîyayîş o. 

 

Goreyê dayeyê ajansê ma arê dayo 8 aşmê peyîn de Kurdistan û Tirkîya de 233 cinî û 33 tutî ameyê qetilkerdiş. 133 cinî û 15 tutî zî bi şik dinyaya xo bedelnayê.

 

Cinîyan derheqê hêriş û tedayê cinîyan ser o ajansê ma rê qisey kerdî.

 

‘Dinyayêke ver bi rastgirî şina est a’ 

 

Endama Meclîsê Partîya Têduştî û Demokrasî (DEM Partî) Îdîl Ugurlu, dîyar kerd ke qetikerdiş û hêrişî tenê bi nê demî sînor nîyê û seranserê dinya de hemverê cinîyan de hêrişêk est o. Îdîle wina dewam kerd: “Cîhan ver bi rastgirî de şino. Bêşik nê deman de tewr zêde verê xo danê cinî û tutan. Qetilkerdişê Narîne, parçekerdişê bedenî çîyêk normal nîyo. Bi serran verê hedîseyê Pinar Gultekîn, Ozgecan Aslan û Munever Karabulut ameyî ciwîyayîş. Nê çîyê ke ma qal kenê, prosesêk derg o. Kokê ci yê tarîxî est ê.”

 

‘Keye dewletêke qij o’

 

Sekretera Cinîyan ê Şubeyê Sendîkaya Kedkarê Weşîye û Xizmetê Komelî (SES) yê Amedî Îlknur Ayik zî fehskerdişê peymana Stenbolî ard vîr û vat, Tirkîya de polîtîkaya bêcezaverdayîşî her ke şina pîş bena û vat: “Dimayê feshkerdişê peymana Stenbolî cînayetê cinîyan zêde bî. Ganî vernî bêro padayîş. Ganî hukmê dewlete, ceza bido nê kiştoxan. Esas de keye xo ra dewletêke qij o. Camêrdî bîyê dewlete û nê ra hêz gênê, merdiman kişenê, desteştiş kenê û nê sey heq vînenê.”

 

‘Çîyê ke ma zanê, yê çapemenî de vejênê’

 

Endama Şaredarîya Bajarê Girdî ya Amedî û Îdarekara Komeleya Edebîyatê Kurdî, Nurcan Delîl zî wina vat: “Tena Kurdistan de qetilkerdiş, desteştiş çin o. Pêro dinya de û Tirkîya de no aver şino. Bi serran verê zî no desteştiş û cînayet est bî. Çîyê ke ma zanê tenê yê çapemenîye de vejênê. Tirkîya de edalet çin o. Şar nêeşkeno fikr û fehmê xo bîyaro ziwan. Yê ke anê zî yenê tepiştiş. Ma nêeşkenê qalê edaletî bikerê. Ganî no bêro cipersayîş.”