ANQARA - Goreyê raporê aşma kanûna 2023ine ê CFWIJî, hemverê rojnamegeranê cinîyan 76 binpaykerdişî ameyî kerdiş û 6 rojnamegerê cinî zî ameyî qetilkerdiç. 

 

Koolîsyonê Rojnamegerîye de Cinî (The Coalition For Women In Journalism-CFWIJ) raporê xo yê aşma kanûna 2023ine eşkera kerd. Eşkerayîye de ame vatiş ke rojnamegerê cinî yê filistînî serdemêk zaf giran ciwîyayî û wina dewam kerd: “Aşma kanûne semedê rojnamegeranê cinîyan ê filistînîjî bî, aşma tewr xidar.” 

 

Tewr tay 14 rojnamegeran rê tehdîd ame kerdiş

 

Dewamê raporî de ame dîyarkerdiş ke aşma kanûne de hemverê rojnamegeranê cinîyan de 76 binpaykerdişî virazîyayî û nê binpaykerdişê heqan zî sey teda, şîdet, cînayet, tehdîd, tedayê qanûnî, hêrişê fîzîkî û xoresnayîşê xeberan ame rêzkerdiş. Ame dîyarkerdiş ke Fransa, Kolombiya, Kanada, Paraguay, Karadag, Pakistan û Sirbistanî de tewr tay 14 rojnamegeran rê tehdîd ame kerdiş, 7 rojnamegerî kar ra eştî û 6 rojnamegerî zî ameyî qetilkerdiş. 

 

Venezuela rêza ewilî de ya 

 

Dewam de ame dîyarkerdiş ke Venezuelayî de qerarê astengkerdişê xoresnayîşê xeberan 13 rojnamegeran rê ameyo dayîş û rêza ewilî de yo. Heto bîn ra bi qetilkerdişê 6 rojnamegeran Gazzeyî de Îsraîl rêza diyîne de, Avustralya û Karadag zî rêza hêrîne de ca girew. Goreyê raporî; Tirkiye, Mogolistan û Pakistan de 4 rojnamegerî ameyî destbendkerdiş. Belarus, Mogolistan û Rûsya de rojnamegerî ameyî tepiştiş û Îran û Kazaxistan de zî ceza 2 rojnamegeran rê ameye birnayîş.