MERKEZÊ XEBERAN - Akademîyê Rizaşehrî yê bajarê Dortmûndî yê Almanyaye, 18-19ê Teşrîna Verêne ya 2023î de "Konferansê Kultur, Huner, Edebîyatî" viraşt.

 

Akademîyê Rizaşehrî (RA) amanc keno ke tarîxê bawerîya elewîtî, felsefe, teolojî, mîtolojî, rîtuel û ercê ci yê komel-kulturî cigêrayîş bikero, bipawo û biresno neslê ameyoxî. Na çarçewa de 22-23yê Nîsane de “Konferansê Akademîsyenan” ameybî viraştiş. 

 

Konferansê 18-19ê Teşrîna Verêne de zî ame amanckerdiş ke na xebata akademîk bi xebatê nuştox û hunermendan ê serê kulturê Rayîrê Heqî yê kurdî reyde bîyarê têkişt. 

 

Goreyê netîcenameyê konferansî, beşdaroxê konferansî roja yewine de derheqê kultur, huner û edebîyatî de 8 sernameyanê cîyayan munaqaşa kerdî. 

 

Beşdaroxê konferans de qala çareserîya xoserîya akademîk, tarîxê elewîtî, teolojî, cografya, mîtolojî, huner û edebîyatî kerdî. Sewbîna binê sernameyê cîyayan de tay babetê esasî ameyî ercnayîş: 

 

*Sena ke bawerîya elewî hîna başa bêra naskerdiş, seba tutan û ciwanan amadekerdişê kitabêk bi anîmasyonî. 

 

 *Ercnayîşê têgêrayîşê kultur û bawerî yê bawerîya Rayîrê/Raa Heqî û açarnayîşê kitabêk.

 

 *Paştîdayîş, averberdiş û vilakerdişê berhemê hunerî yê ziwanê kurdî de.

 

 *Komkerdişê nuşteyê ziwanê kurdî de, analîzkerdiş û weşanayîşê ci. 

 

 *Destpêkerdişê xebatê Muzeya Etnografîyî.

 

*Seba cinîyan akerdişê kursê terzî, naskerdişê berhemê înan û ekonomîye. 

 

 *Awankerdişê komîsyonêk ke raşteyê kultur, huner û edebîyatî de bixebetîyo. 

 

Sey netîcenameyî ame vatiş ke merasîmê winasî seba pawitişê kultur û hunerî xeylê muhîm ê. Akademîyê Rizaşehrî heme dostê ke tewrê konferansî bîyî sipas kerd û dîyar kerd ke ê do hêvîya xo ya seba ameyoxî gandar biverdê.