Rengîn Azîzoglu

 

DÊRSIM - Hemsereka HDPyî ya Dêrsimî Nurşate Yeşîl vat: "Ganî ma nêrazîbîyayîşê xo her ca de bimojnê ra.''

 

Dêrsim bi serebûtanê îstîsmarî û serebûtê Gulîstan Doku ya ke 17 roj ê ke vînbîyaye ya rojdem de yo. Wendekara Zanîngehê Munzurî Gulîstan Doku ra 5ê çeleyî ra nata xeberêke çin a. Şar vera îstîsmarê domanan nêrazîbîyayîşê xo hema zî mojneno. Hemsereka HDPyî ya Dêrsimî Nurşate Yeşîl rewşa peyêne ya Dêrsimî ercnaye.

 

'Qeraro nimte seba pawitene gumanbaran o'

 

Nurşate bale ante serebûtanê îstîsmarî ser û vat: ''Dewaya îstîsmarê domananê Pêrtagî bira nimite esta. Coka ma nêeşkeyê keyeyan reyde pêvînayîş bikerê. Heyfo ke na bira nimite mexduran ney kerdoxan pawena. Ganî kesê pisporî keyeyan reyde pêvînayîşan bikerê."

 

'Efû yê seba îstîsmarî nîno qebulkerdene'

 

Nurşate vist vîrî ke qanûnê efû yê seba îstîsmarê domanan nêno qebulkerdene û vat: ''No qanun do bikero ke îstîsmarî bibê zêdêr. Efûkerdişê îstîsmarî nêbeno. Ganî cezaya hîna pîtêre bêra dayene. Nê hetî ra ganî vînayîşê komelî bêro vurnayene. Vatişê hukmatî û medya ganî bêrê vurnayene."

 

'Ganî ma xo bipawê'

 

Nurşate îfade kerd ke Dêrsim de çeteyê fuhuşî esto û no çete keno ke komel çin bikero. Nurşate vat: "Ma venga cinîyan danê ke ganî hîşyar bibê. Ma sey şarî ganî xo bipawê û gerrayê nê merdiman bikerê. Xora bawerîya ma bi huqûqî çin a. La ganî ma şorê edlîye, gerreyê nê kesan bikerê û nînan verê komelî de teşhîr bikerê ke na cezaya tewr girînge ya."

 

'Gulîstan Dokuye ça de ya?'

 

Nurşate derheqê Gulîstan Doku de zî nê zanayîşî dayî: ''Dêrsim de her ca de mobeseyî estê. La hêzê asayîşî nêeşkenê Gulîstane bivînê û ê zanayîşêk nêdanê ma. Ma sey cinîyan do bibê teqîbkerdoxê serebûtê Gulîstane. Ma zanenê ke no serebûtêkê xokiştişî nîyo. Ma do nê dewa ra fek vera nêdê û tim vajê ke 'Gulîstan Doku ça de ya? Ma rayberîya Platformê Cinîyan ê Dêrsimî de vera îstîsmarê domanan û cinîyan tay planê çalakîyan kerd. Bi nê hawayî ma nêrazîbîyayîşê şarê Dêrsimî mojna. Ma bikerê ke nê dewayan teqîb bikerê. Nêrazîbîyayîşê lehzêkan ma rê fayde nêkenê. Pêrtag de camêrdo 70 serrî yo ke kênayêka 17 serre îstîsmar kerde roniştişê yewînî de ame veradayene. Çunke ma ê dewayî teqîb nêkerdî. Ganî ma nêrazîbîyayîşê xo her ca de bimojnê."