DÊRSIM - Vejîya raşte ke Gulîstan Doku a ke 6 rojî yo Dêrsim de vindîbîyaye ye tewr peynî embazê xo Zaynal Abarokî reyde telefon de qisey kerda.

 

Vejîya raşte ke wendekara Beşa Averberdişê Domanan ya Unîversîteya Munzurî Gulîstan Doku a ke 6 rojî yo Dêrsim de vindîbîyaye ye tewr peynî embazê xo Zaynal Abarokî reyde telefon de qisey kerda. Baroya Dêrsimî qeydê sînyalî yê HTSyî wete. Avûkatê baroya Dêrsimî qeydê sînyalê telefonî kerdî taqîp. Vejîya raşte ke Gulîstan Doku roja yewşeme taxa Ataturkî de saet 16.26î de telefono ke serê nameyê Engin Yucelî ameyo qeydkerdene de qisey kerda. Badê cigêrayîşê avûkatan ame zanayene ke Zaynal Abarokî bi telefonî qisey kerdo. Avûkatan telefono ke tespît kerdî dayî Serdozgerîya Komarî ya Dêrsimî.

 

Zaynal Abarok kesêko Rûsî yo. Dêrsim de hetê polîsêk de cuyeno û no polîs ci kerdo sey lajê xo. Abarokî Rûsya de ameyo dinya û Rûsya de pîl bîyo. Ame zanayene ke Zaynal û Gulîstan Doku cafeyêko ke tede xebetîyayêne de yewbînan şinasnayî. 

 

Şewa 5ê çeleyî ra nata Gulîstane ra xebere nîna girewtene. Hetê polîsan ra ame tespîtkerdene ke Gulîstane tewr peynî saet 11.29î de taxa Ataturkî de hemverê awanîya Walîtîye de ameya tespîtkerdene.