WAN - Hepsîya bi nameyê Şefîke Bîlîcî ke 10 serrî yo zindan de manena, 6 rey ameya surgunkerdene û tewr peyîn zî surgunê zindanê Tîpê Tyê Kayserî amî kerdene û uca de zî bi qedexeyan dir rast amî. Dayîka aye Halîme Bîlîcî, va ke seba kêna aye vera cigêrayîşê viranî vejîyaya, cezaya qedexeyî pêvînayîş û telefonî ci rê birnayê.

 

Şefîke Bîlîcî (40) 2010an de operasonê KCKî de tepişnayî û heta nika 7 zindanan de menda. Şefîkeye tewr peyîn 1ê Tebaxa 2014an de surgunê zindanê Tîpê Tyê Kayserî ameye kerdene. Polîtîkayê cezaya her zindanî estbî û uca de zî dewam kerdî. Dayîka aye Halîme Bîlîcî da zanayene ke semedo uca cigêrayîşê viran qebûl nekerda, qedexeyê pêvînayîşê keye û telefonî dayê û pereyê ke eşrawenê mengêka bîn danê ci.

 

'Hepsî rastê îhlalkerdene yê giran yenê'

 

Halîmeye vat, hepsîyê cinî rastê her tewir îhlalan yenê û wina vat: "Koxuşê înan serdin ê, pak nîyê û werdê înan zaf xirab ê. Gama ke nêweş kewenê, bi kelepçe benê nêweşxane. Wexto ke yenê surgunkerdene zî rastê cigêrayîşê viran yenê. Seba nê qebûl nêkenê zî qedexeyan danê înan. Ma pere danê mengêka bîne danê aye. Heqeretan hepsîyan rê kenê. No çîyêko nîno qebulkerdene yo."

 

'3 serrî yo nêeşkena şîrî pêvînayîş'

 

Halîmeye dewamê qiseykerdişê xo de wina vat: "10 serrî yo kênaya mi tepişnayeya. Hema cezaya çi bi aye danê antiş! Tewr peyîn surgunê Kayserî kerdî. Seba ke dûrî yo, nêweşîya bi qelbî esta bi 3 serrî yo ez nêeşkena kêna xo bivînî. Ma fek dewa û nasnameyê xo ra vera nêdanê. Hepsîyan rê heqeret yeno kerdene. Domanê ma seba ziwanê xo têkoşîn dayî."