Safiye Alagaş

 

STENBOL- Mamostayanê Enstîtuyê Kurdkî yê Stanbolî bale ante ser ke ziwan seba dewamê estbîyayîşî hacet o û vera politîkaya asîmîlasyonî vat: "Ganî her keye seba kurdkî bibo wendegehêke.''

 

Ziwanê kurdkî vera polîtîkaya asîmîlasyonî ya sîstematîke têkoşîn keno. Enstîtuyê Kurdkî yê Stanbolî zî bingeyêkê nê têkoşînî yo. Enstîtu serra 1992î de bi armancê averberdişê ziwanê kurdkî ame awankerdene. Mamostayanê Enstîtuyê Kurdkî ard ziwan ke seba ke ziwanê kurdkî aver şêro û biciwîyo ganî hîna zêde têkoşîn bêro kerdene. 

 

'Kêmîyo tewr pîl oyo ke domananê xo dir kurdkî qisey nêkenê'

 

Mamostayan ra Ozleme Kurt îfade kerd ke ziwanê kurdkî ho çin beno û ganî kurdî pê naye bihesîyê û wayîrê ziwanê xo bivejîyê. Ozleme vat: " 20 serran ra dima têna beşêkê komelê ma do kurdkî qisey biko. Jenerasyono newe kurdkî ra beno dûrî. Heyfo ke wina yew rastîye esta. Pêro îqtîdaranê Tirkîya polîtîkaya asîmîlasyonî ya vera kurdkî xebitnaye hema zî xebitnenê. Ganî ma domananê xo reyde kurdkî qisey bikê. Çar parçeyanê Kurdîstanî de polîtîkayê asîmîlasyonî bi cayanê karan, bi televîzyonan yenê caardene. Eke vera naye tedbîranê xo nêgêrê polîtîkaya asîmîlasyonî do ser bikewa. Aslê xo de tedbîrgirewtiş zaf asan o. Ma dadîyanê xo ra kurdkî musenê. Eke dadîyî keyeyanê xo de kurdkî qisey bikê polîtîkaya asîmîlasyonî do bin bikewa. Ganî ma keyeyanê xo de kurdkî qisey bikê."

 

'Ziwan hacetê dewamkerdene bîyayîşê şarî yo'

 

Mamostayanê Enstîtuyê Kurdkî yê Stanbolî ra Fevzîye Uçare zî wina vat: "Na dewlete tewr zaf hêrişê ziwanê ma kerd. Çira? Çunke ziwan nasnameyê ma yo. Ziwanêk bingeyê estbîyayîşê neteweyêkî yo. Ganî her keye seba kurdkî bibo wendegehêke. Ganî ziwanê sîyasetê kurdan zî kurdkî bibo. No zaf girîng o. Çunke têna bi nê hawayî ziwan mîyanê komelî de vila beno û şar wayîrê ziwanê xo vejîyeno, ziwanê xo aver beno. Reyna kurdkî bi nê hawayî keyeyan de beno vila."