MERKEZÊ XEBERAN - Dayîka Dirrê Gornu ya ke camêrdê ci û 2 lajê ci ameyê kiştene û aye zî 24ê kanûne de Êlih de wefat kerd şaristanê Salzgitterî yê Almanya de ameye yadkerdene.

 

Dayîka Dirrê Gornu ya ke dewleta tirke camêrdê ci û 2 lajê ci qetil kerdî û aye zî 24ê kanûna 2019î de Êlih de wefat kerd şaristanê Salzgitterî yê Almanya de ameye yadkerdene.

 

Masaya yadkerdişî bi fotografanê her hîrê şehîdan û dayîka Dirrê bi gul û findanan ameye xemilnayene.

 

Lajê dayîka Dirrê Metîn Gornuyî derheqê dadîya xo de qisey kerd û vat: "Dadîya mi zaf zorî û zehmetîye ante. Ma neçare mendî ke welatê xo caverdê. Dadîya mi cinîyêka çêre bîye, qet sereyê xo vera zordarîye de nêard war. Tim ma rê vatêne: 'Welatê xo, dewaya xo xo vîrî ra mekê. Dadîya mi cinîyêka kurdîstanije bîye. Dadîya mi qet pê cuya Almanya qayîl nêbîye, tim waştêne abigêra welatê xo. Rojêke bire daye û agêraye şîye welatê xo. Uca de rewşa weşîye ci zî bîyêne başêr. Wexto ke dadîya mi şîye rehmî 15 hezar merdimî ameyî şîna ma yê Êlihî. Seba aye Hollanda de di rey şîne ameye ronayene û ewro zî Salzgitter. No çîyêko zaf taybet o.''

 

Dima Têgêrayîşê Cinîyan ê YJKyî ser o Hakîme Yosef qisey kerd û vat: "Na dadîye û domananê ci yê ke sere wedarit mîyanê xoverdayîşî de ca girewt."

 

Kênaya dayîka Zemzema zî yadkerdiş de qisey kerd û vat: "Ganî şarê kurdî na dewa teqîb bikê û wayîrê vi vejîyê. No waştişê nê dadîyan o ke domanê înan şehîd bîyî."

 

Temsîlkarê KOMAWî Apê Hesenî qisey kerd û vat: "Şehîdê ma vanê ke ma xo seba şima feda kenê şima zî wayîrê dewaya ma bibê. Nê rayîrî ser o gonîya ma zaf ameye rijnayene û dadîyanê ma zaf dej ant. Ma keyeyî ra serweşîye wazenê û ma vanê ke şehîdî nêmirenê.''