Sorgul Şêxo 

 

HESEKÊ - Dewa Um El-Xêrî hetê dewleta tirkî ya dagirker û komê girêdayê aye ra ameye topvarankerdene. Cinîyê dewe ke vera topvaranî reaksîyon ramojnayî, vatî eke topvaran bikerî zî, ê do fek dewa xo ra vera nêdê.

 

31ê Kanûna 2019an de dewleta tirkî û hemkarê aye, dewa Um El-Xêrî ke 7 km dûrê Rojawanê qezaya Til Temirî ya û nêzdîyê dewa Leylane ya, bi obus û hawanan topvaran kerdî. Cinîyê dewa Um El-Xêrî ke topvaran şermezar kerdî, derheqê topvaran û zehmetîyê ke hetê dewleta tirkî û komê girêdayê aye de ciwîyenê, qalî kerdî.

 

'Dewleta tirkî domanan hedef gêna'

 

Hûrîya Dalime topvaranê dewleta tirkî serê dewe û çîyê ke ciwîyenê wina qalî kerde: " Vizêrî dewleta tirk û komê çeteyan, dewa ma topvaran kerdî. Seba ke dewleta tirkî her wext domanan hedef gêna, mi sere de domananê xo bi lez tebera ardî zere û nimitî. Çi gunayê nê domanan esto, rewşêka wina de ciwîyenê. Ma ti zordestî kesêke rê nêkerdo, ê çira hêrişê ma kenê."

 

'Pêwa topvaranî ma do herra xo bipawê'

 

Heno Salime zî wina va: "Pêwa hende hêriş, topvaran, nêpeydakerdene lazimîyê cuye zî ma do dewa xo de bimanê û ma fek vera nêdanê. Bajar rijnayî, mal û milkê şarî talan kerdî, hema zî Erdogan çi wazeno? Bi mayînê înan sivîlêk dewe cuya xo vindî kerd. Herra ke nika ma ser de ciwîyenê, erje ma ya tewr girîng a. Herra ma rûmete ma ya, ma do heta peynî xo ver bidê."