MÊRDÎN - Ame îdiakerdene koyê Omeryan de, nêzdîyê mengêka yo qorîcî û şîrketê taybet darê herêmî birnenê û darê ke bi îdiayê ‘malê xezîneyî yê’ ameyê birnayene, roşenê.

 

Koyê Omeryan ke mabêne sînorê Omerî, Mîdyat û Nisêbînê Mêrdînî de ca gênê, ame îdiakerdene ke darê uca hetê leşker û qorîcîyan ra yenê birnayene. Menga Êlule de herême de ameyî ciwîyayîş û dimayê nê tîya operasyon dewam kerd. Dewijê herême, dîyar kerdî ke înan ra ameyo vatene ke, bi qorîcîyan dir daran bibirnê û dewijan nê qebûl nêkerdê û rastê tehdîdê qorîcîyanê qerekole ameyê. Dewijan ard ziwan ke bi mengêke darî yenê birnayene û îdiakerdene ke kolî ameyê birnayene zî yenê rotene.

 

'Serê tonî roşenê'

 

Keyayê ke nêwaşt nameyê xo bido, derheqê babete de wina va: "Verê seba erdê ke tapoyê înan çinbi, qanûnê vetişê tapoyî ame vetene. Nê rojnameyê fermî de zî weşênayî. La erdê bi desan keyeyî sey wareyê daristanî derbaz kerdî. Tapo nêdayî keyeyan. Nika şîrketî kewtê koyan û vanê, ‘malê xezîneyî yo’ birnenê. Ma qalê 800 donim wareyî kenê. Darî yenê birnayene û serî tonî roşenê.”

 

'Hamnanî veşnenê, zimistanî birnenê'

 

Dewijan vera rewşe reaksîyon ramojnayî û dîyar kerdî ke koyê Omeryan her serre, seba şewato ke vejîyeno darî veşenê û vatî: "Nika zî daran qetil kenê. Hem ma tehdîd kenê û hem zî malê ma gênê. Daran birnenê. Hamnanî veşnenê, zimistanî zî birnenê.”