MERKEZÊ XEBERAN - KCDyî bi eşkerayîyêka nuştekî roşanê Noelî ê Xrîstîyananê ke Kurdistan de cuyenî û ê pêroyê dinya bimbarek kerd û ame vatene ke wa roşanê Noelî bibo wesîleya aştî û asayîşî.

 

Kongreya Komela Demokratîke (KCD) bi eşkerayîyêka nuştekî roşanê Noelî ê Xrîstîyananê ke Kurdistan de cuyenî û ê pêroyê alemê Xrîstîyanan bimbarek kerd. Eşkerayîya nuştekî de ame vatene ke bi hezaran serrî yo ke bawerîyê cîya-cîyayî serê cografyaya Rojhelatê Mîyanenî, Kurdistan û Anatolîye de pîya cuyenî û wina dewam kerd: “Mîyanê erjanê ke bawerî û kulturê cîya-cîyayan mîyanê xo de danî cuyayene ra yew zî roşan o.”

 

KCDyî eşkerayîyêka nuştekî de bale ant roşanê Noel (Yaldo) ser û eşkerayî wina dewam kerd: “Mîyanê roşanan ra yew zî roşanê Noelî (Yaldo) yo ke 2 hezar serrî yo cografyaya ma de hetê Xrîstiyananê welatê ma de cuyenî ra yeno binbarekkerdene. Ma bawer kenî ke do roşanê Noelî hurmetdayîşê mabenê bawerîyan hîna xurt bikero û bibo wesîleya aştî û asayîşê mabenê şaran.”

 

Eşkerayîyêka nuştekî ya KCDyî wina qedîyaye: “Ma bi nê hîs û fikiran sere de roşanê Noelî ê Xrîstiyananê ke Kurdistan de cuyenî û ê pêroyê alemê dinya bimbarek kenî. Wa no roşanê Noelî bibo wesîleya aştî û asayîşî.”