SÊRT- Vizêr leşkeran eşt deweka Umyanîsî ya dewa Doganî ya qezaya Berwarî ya Sêrtî ser û 19 kesî destbend kerdî. Mabênê nê kesan de dadîye û waye û birayê karkerêkî estê ke roja sêşemeyî Şirnex de binê tirokewte de mend.

 

Roja sêşemeyî leşkeran eşt deweka Umyanîsî ya Sêrtî ser. Leşkeran bi îdîayanê ''propagandaya rêxistine'' û ''rêxistine rê erşawitişê endamî'' keyeyan de cigêrayîş kerd û nêweşê kanserî Ahmet Tunço 70 serre zî tede 19 kesî destbend kerdî. Ame zanayene ke Ahmetî dima ke dozgerîye de îfade da ame veradayene.

 

'Domanî tena mendî'

 

Dadî, way û birayê karker Hasan Înalo ke roja sêşemeyî Şirnex de binê tirokewteyî de mend ameyî destbendkerdene. Ame parekerdene ke Ahmet Batibey (15), Leyla Batibey û Dîyar Tunç ê ke ameyî destbendkerdene doman ê. Goreyê zanayîşan seba ke zaf roniştişê deweke ameyî destbendkerdene domanî têna mendî û heywanî zî bêwayîr mendî.