Rûperîn Bekir

 

ŞEHBA - Cinîya bi nameyê Stêrvan Ebdoya ke mûran ra bererdaşê cîya viraznena wina va: "Ez wazena ageyrî keyeyê xo û keyeyê xo yê ke rijyayo bi destê xo bixemlînî."

 

Koçberbîyayîşê şarê Efrînî vera domkerdene cuya înan nêbi asteng. Her çiqas dejê koçberî giran bo zî cuya xo her tewir dewam kenê. Cinîya bi nameyê Stêrvan Ebdoya 20 serrî ke qezaya Şêrewa ya Efrînî ra ya û nika kampa Serdemî rê ca bîya. Kenêyêka Stêrvane esta. Stêrvane bi hunerê destê xo mûran ra berardişê cîya cîya awan kena.

 

'Hunerê xo bi destê xo aver bena'

 

Stêrvane bale ante serê hunerê xo û wina va: "Bi mûran bazin û gerdane viraznena. No karê hunerê mi 14 serrîya xo ra dest pêkerd. Efrîn de îmkan xeylêk bi, seba nê ma xeylêk hunerê cîya aver berd. Ez nê karî ra zaf hes kena, seba nê dewam kena. Ez derzenî, la û mûran ana û bi destê xo hunerê xo aver bena."

 

'Ez çadiran zî neqiş kena'

 

Stêrvane dîyar kerde ke goreyê îmkanê xo hunerê xo aver bena û wina va: "Ez roj de 4 bazinan viraznena. Her bazinêke 2 saetan de amade kena. Tîya goreyê waştişê kesan kar kena û goreyê îmkanê xo roşena. Batanî ra zî xeylêk neqşê cîya viraznena, yê ke wazenê şina çadiranê înan zî neqiş kena. Eynî wextî de batanî ra çente zî viraznena."

 

'Wazena keyeyê xo rijnaye bixemlînî'

 

Stêrvane tewr peyîn waştişê xo wina va: "Waştişê ma tena ageyrîşê Efrînî yo. Ez wazena ageyrî keyeyê xo û bi destê xo keyeyê xo yo rijnaye bixemlînî."