STENBOL- Kedkaranê çapemenîya azade tepiştişê 3 embazanê xo protesto kerd. Çalakîye de ame waştene ke rojnamegerî Sadîye Eser, Sadik Topaloglu û Yusuf Topaloglu cade serbest bêrê veradayene.

 

Kedkarê çapemenîya azade verê Şûbeyê Komeleya Heqanê Merdiman (ÎHD) yê Stenbolî de ameyî têhet û tepiştişê 3 embazanê xo protesto kerd û waşt ke ê cade serbet bêrê veradayene.

 

'Rojnamegeran serbest vera bidê'

 

Çalakîye de ame waştene ke muxabîrê Ajansê Mezopotamya Sadîye Eser, Sadik Topaloglu û muxabîrê DÎHA ke ameyebî qefilnayene Yusuf Topaloglu yê ke 3ê kanûne de ameyî tepiştene wa cade serbest bêrê veradayene. Eşkerayîye de wina ame vatene: “Ma ewro semedê serbest veradayîşê embazanê xo ameyî pêser û ma wazenê reyna vajê ke ma do çirey vera zulm û zordarîye peyser game meerzê. Bi nê hêrişan yeno waştene ke vengê ma bêro birnayene la ma hiş nêkenê. Ma do nuştişê raştîye rê dewam bikerê û peyê heqîqetî de şirê. 

 

'Rojnamegerî sûc nîya'

 

Dewam de wina ame vatene: "Ma zaf hol zanê ke rojnamegerîye suc nîya. Tepiştişê embazanê ma yeno manaya hêrişê vera çapemenîya kurdan. Embazanê ma yê ke şima bi keyfî bîlasebeb tepiştî serbet veradê. Bi zext û hêrişan şima çîyêk dest nêfînenê. Ma şima ra nêtersenê. Senî ke heta rewro ma vera hêrişanê şima çok nêda ma do ewro ra tepîya zî çok nêdê."