AMED - Amed de kombîyayîşê yewîya neteweyî ra dima deklarasyonêk ame weşanayene. Deklarasyon de bale ancîya muhîmîya yewîya kurdan ser û ame vatene ke partîyê kurdan do menga çeleyî de komxebatêk bikerê.

 

Temsîlkaranê Kongreya Komela Demokratîke (KCD), Partîya Demokratîke ya Şaran (HDP), Partîya Herêmê Demokratîkî (DBP), Komeleya Kurdan yê Demokratan yê Şorişgêran (DDKD), Partîya Demokrate ya Kurdistanî-Tirkîya (PDK-T), Platformanê Demokratan yê Kurdan yê Vakurî (PDK-Vakur), Partîya Merdiman û Azadîye (PÎA), Têgêrayîşê Azadî, Partîya Komunîstanê Kurdistanî (KKP) deklerasyonê kombîyayîşê yewîya neteweyî eşkera kerd.

Kombîyayîş otêleka Yenîşehîrî de ame kerdene û Hemserekê KCDyî Berdan Ozturk, Hemserekê DBPyî Keskîn Bayindir, wekîlê HDPyî Tayyîp Temel û Nusrettîn Maçîn û temsîlkarê partîyan tewrê kombîyayîşî bîyî. Tirkîya deklerasyonî hetê Hemsereka DBPyî Salîha Aydenîz ra kurdkîya ci zî hetê Serekê Pêroyî yê PÎA Mehmet Kamaçî ra ame wendene.

 

'Sîyasetmedarê kurdan bi hawayêko kêfî yenê destbendkerdene û tepiştene'

 

Dewamê deklarasyono de wina ame vatene: "Ma venga şarê kurdî danê ke vera zulmî û teda wa hêzê xo biko yew! îqtîdarê AKP-MHPyî bi hawayêkê bêhuqûqî hemşaredarê ma yê ke hetê şarî ra ameyî weçînayene wezîfe ra gêno û herinda înan de qeyûman tayîn keno. Bi nê hawayî îradeyê şarê ma û demokrasî binpay keno. Operasyonê sîyasî yê vera sîyasetmedaranê kurdan zî bi nîzamî dewam kenê. Îqtîdar keno ke heqê sîyasetkerdişî yê şarê ma çin biko. 

 

'Vera vindîkerdene ma tifaqê xo bikerê yew'

 

Na rewşe ya ke zere û teberê welatî de vera kurdan dewam kena, sere de yewîya neteweyî xîretê neweyî pêşkêşê ma kena. Serebûtê ke çar parçeyanê Kurdîstanî de qewimîyenê bala rayaumûmîya dinya ancenê rewşa kurdan ser. Eke ma hêzê xo bikê yew hêzê mîyanneteweyî do hîna zêde paştî bidê têkoşînê xo yê demokratîkî, haştîyanê û sîyasîyî. Waştişê şarê ma vera zulmî, teda, feqirîye yewbîyayîş o. Bi nê armancî 5ê teşrîna peyêna 2019î de nê partî û têgêrayîşanê ke cêr de îmzaya înan esta kombîyayîşêkê bi rojdemê yewîya neteweyî serûber kerd.

 

Kombîyayîş de nê qerarê ameyî girewtene:

 

* Vakurê Kurdîstanî de Îtîfaqê Neteweyî do bêra awankerdene

 

*  Derheqê esasê Yewîya Neteweyî de xebatî do bi nameyê ''Xebata Yewîya Kurdîstanî'' bêrê kerdene

 

* 18-19ê çeleyê 2020î de derheqê metodan, çerçewa, caardişî, kerdişê Yewîya Neteweyî de komxebatêk do bêra kerdene.

 

* Amadekarîya komxebate hetê komîsyonê panc kesan ra do bêra serûberkerdene

 

* Xebata Yewîya Neteweyî seba tewrbîyayîşê pêro hetan û partîyanê kurdîstanijan do amade biba.