AMED -  Seba balantene serê heqê ziwan û edebîyatê yê cinîyanê Kurd, şewa şîîre ya cinîyanê Kurd ame organîzekerdene. Hemsereka KCDyî û Parlamentera HDPyî Leyla Guvena ke beşdarê şewa şîîran ya cinîyanê Kurdan bî wina vat: "Cinîyê kurdî wazenê ke têkoşînê xo yê vera asîmîlasyonî pêro dinya de bidê zanayene."

 

Amed de bi beşdarîya Kurd-Penî, Komeleya Cigêrayîşê Ziwan û Kulturî ya Mezopotamya û Platformê Qelema Cinîyan ê Mezopotamya ''Şewa Şîîrî'' ameye serûberkerdene. Wekîla HDPyî ya Colemêrgî û Hemsereka Kongreya Komelê Demokratîkî (KCD) Leyla Guven, Wekîla HDPyî ya Amedî û Hmsereka DBPyî Salîha Aydenîz û zaf kesî beşdarê aktîvîte bîyî.

 

'Ma minetdarê nê cinîyan û dayîkanê xo yê'

 

Leyla Guven a ke aktîvîte de qisey kerd û bale ante serê asîmîlasyonî û vat: "Cinîyê kurdî wazenê ke têkoşînê xo yê vera asîmîlasyonî pêro dinya de bidê zanayene. Nika tîya de embazê ciwanî estê. Ê şahîdê têkoşînê verênî yê vera asîmîlasyonî nêbîyî la bi qelemanê şahîdan pê hesîyayî. Nika ê kesî bi nuştişî têkoşînê xo danê zanayene. Ganî ma wayîrê nê têkoşînê înan bivejîyê. Ziwanê ma, kitabê ma , deyîrê ma, şîîrê ma yenê qedexekerdene la şarê kurdî hema zî vera nînan têkoşînê xo dewam keno."

 

'Ma do nê qedexeyan nas nêkerê'

 

Leylaye dewam de va ke çîyê ke ameyê sereyê kurdan bêro qalîkerdene nêqedîyeno û vat: "Roboskî û Til Rifat de domanî ameyî qetlkerdene. Şarê kurdî do ney xo vîrî ra nêkero. Ganî ma vera nînan vajê hînî bes o. Kurdan ra ber dostê kurdan çin ê. Cinîyê kurdî, şerwanê kurdî vera nê sîstemî milê xo do çewt nêkerê. Ma do wayîrê ziwan, kultur, tarîxê xo bivejîyê. Ma do nê qedexeyan nas nêkerê."

 

'Heta nê game eke ziwan ameyo sewîyayêka bi vindertişê mayan û cinîyan bîyo'

 

Dima ra Hemsereka Pêroyî ya Herêmê Demokratîk (DBP) û parlamentera HDPyî Salîha Aydenîze qisey kerde û aye zî vat: "Xoverdayîşê cinîyanê kurdan hetê pêro dinya ra sey mîsal yeno qebulkerdene. La wazenê ke nê destkewteyanê ma çin bikê naye ra hêrişê Rojawanî kenê. Destkewteyanê Rojawanî kenê hedef."

 

'Ma do Tedaya Vera Ziwanê xo Qebul Nêkerê'

 

Nuştox û rojnamegere Roza Metîna îfade kerd ke ê ameyî pêser ke şîîranê cinîyanê tepişteyan ê kurdan biwanê ke nameyê nê cinîyan nênê zanayene û vengê înan nênê eşnawitene. Rozaye vat: "Ma do wayîrê erjanê xo bivejîyê û vera asîmîlasyonî têkoşînê xo dewam bikê. Ma do dewam bikê ke bi kurdkî bifikîrê, qisey bikê û binusê. Ma do tedaya vera ziwanê ma qet qebul nêkenê.

 

Aktîvîte bi wendişê şîîran qedîyaye.