ŞENGAL - TAJÊ vera qirkerdişê ke Til Rifatî de hetê dewleta tirkî ra ame kerdene ser o eşkerayî da. Eşkerayî de ame neqlkerdene ke ganî pêro dinya vera qirkerdişê serê şarê Kurdî de yenê kerdene wirzê serê lingan.

 

2yê Kanûne de dewleta tirkî bi topan hêrişê dewa Til Rifatê kerd û netîceyî de 8 ci ra doman 10 kesî cuya xo vindî kerdî.  Tevgerê Cinîyanê Azadan yê Êzidîyan (TAJÊ) vera qirkerdişê ke ame kerdene eşkerayî da.

 

Eşkerayî wina ya: 

 

"Ma sey Tevgerê Cinîyanê Azadan yê Êzîdîyan nê qirkerdişê wehşetî şermezar kenê û veng danê pêro rêxistinê ke heqê merdiman pawenê, heqê domanan pawenê ke vindertişêke tewr zêde radîkal ramojnê û çimanê xo vera nê şideto ke yeno meşnayene nêgîrê. 9ê teşrîna verêne ra heta nika hêrişê dewleta tirkî yê faşîst, serê şarê Rojawanî de bihawayêko şîdet dewam keno. Adirbest yeno îhlalkerdene. Kesê ke netîceyê nê hêrişan û qirkerdişan de wareyê xo rê koçber bîyê û kampan de ciwîyenê û ê zî hedef yenê girewtene. Ma veng danê kesê ke wayîrê wicdanî yê ke vera qirkerdişî bêveng nêmanê. "