WAN - Dimayê ke qeyûm tayînê şaredarîya Artemîtî yê Wanî bi, projeyê awa kanalê nêmcet mend. Welatîyan waştî ke dorê cayê ke seba doman û heywanan rîskêko pîl o, bêro girewtene û ardî ziwan ke qeyûm ti xizmet nêkeno.

 

Weçînayîşê herêmî yê 31ê Adare de pêwa ke namzeda HDPyî Gulcan Kaçmaze bi xeylêk rayan weçînayîş qezenc kerde zî YSK bi sebebê ke Gulcane bi KHKyî ameya îxrackerdene mazbata aye nêdayê. Vera Gulcane namzedê AKPyî ardî şaredarîye. Bi çinkerdişê îradeyê şarî, tewr zêde zirar danê şarî.

 

Dorê kanalî akerde mend

 

Şaredarîya DBPyî wextê xo de dorê kanalê awe ya taxa Bayirli viraşt û seba bi asinan bêro girewtene projeyek da destpêkerdiş. La dimayê qeyûm nêmcet mend. Hem boye kanalî ra yena û hem zî seba doman û heywanan xeter o. Welatîyê ke nêzdîyê kanalî de ciwîyenê, seba doman û heywanê înan nêkewê kanal, hewl danê bi poşet û daran bigîrê.

 

Cinîya bi nameyê Antîka Saribogaye dîyar kerde ke wextê şaredarîya DBPyî de xebate ameyne kerdene û nika tu xizmet qezaya înan de nîno kerdene û wina va: "Ma seba dorê kanalî bêro viraştene, muracat kerd û şaredarîya DBPyî hema hema proje viraşt la nêmcet mend. Kutik kewenê kanal û hamnanî boye dano. Domanî hewl danê ke derbaz bibê û bi rîsk o. La şaredarîya nika tu xebat nêkena."