STENBOL - Stenbol de roniştişê dewa ‘Ozgur Gundem’ û ya ‘KCK Avûkatan’ ame kerdene.

 

Dewaya ke nuştoxê rojnameya Ozgur Gundem û endamê desteya şewirmendîya weşanî tey ameyêne muhakemekerdene roniştişê xo yê 14. Dadgehê Cezaya Girane yê Stenbolî yê 23.î de ame kerdene. Rojnameger Înan Kizilkaya, nuştoxê Ayşe Necmiye Alpay û Hemsereka Pêroyî ya ÎHDyî Emîre Eren Keskîne tewrê dewa bî. Heyetê dadgehî roniştiş apey eşt bi 13ê çeleyê 2020î. 

 

Roniştişo 11. ê dewa Rojnameger û Mudirê Pêroyî yê Rojnameya Cumhurîyetî yê verênî Can Dundaro ke tewrê Nobeta Mudiranê Pêroyî ya Rojnameya Ozgur Gundemî bîbî û ci rê dewa ameybî akerdene Dadgehê Cezaya Girane yê Stenbolî yê 22.î de ame kerdene. Heyetî waşt ke seba Canî nuşte teberê welatî rê binusê û dewa apey eşte bi 21ê gulana 2020î.

 

Roniştişê “Dewa Avûkatanê KCKyî” yê muhakemekerdişê 46 avûkatanê Rayberê PKKyî Abdullah Ocalanî Dadgehê Cezaya Girane yê Stenbolî yê 19.î de ame kerdene. Tayê avûkatê ke teber de yenê muhakemekerdene û zaf avûkatê bînî beşdarê roniştişî bîy. Avûkatê ke netepîşte yenê muhakemekerdene ra Îbrahîm Bîlmez, Mûstafa Eraslan, Asya Ulker, Mehmet Sanî Kizilkaya û rojnameger Cengîz Kapmaz beşdarê roniştişî bîy. 

 

Xeylêk avûkatî roniştişî de amede bî û heyetê xerîban/pêşeyan roniştiş teqîb kerd. Bi destpêkerdişê roniştişî vejîya meydan ke heyetê dadgehî ameyo vurenayene.

 

Heyetî pey cû roniştiş apeyde eşt bi 26ê adara 2020î.