Rojda Seyidan

 

QAMIŞLO - Mamoste û wendekarê bajarê Dêrikî seba 20ê Teşrîna Peyêne Roja Heqê Domanan ê Dinya vatî: "Ma biomid ê domanê ke wendegehê xo ra dûr kewtê, ageyrê wendegehanê xo û wendişê xo dewam bikerê."

 

20ê Teşrîna Peyêne her ca de sey Roja Heqê Domanê ya Dinya yeno naskerdene û pîrozkerdene. Seba pawitişê domanê mîyanê şerî de û sirgunê 20ê Teşrîna Peyêne 1989an de Heyetê Pêroyî yê Neteweyê Yewbîyaye, "Pêameyîşê Heqê Domanan" ame îmzakerdene. Coka 20ê Teşrîna Peyêne sey Roja Heqê Domanan ê Dinya yeno pîrozkerdene. Labelê Rojawanê Kurdistanî no pêameyîş bi ca nîno û bi seyan domanî yenê qetilkerdene. Çimkî her wext hêriş vera Rojawanî yenê kerdene. Derheqê babete de mamoste û wendekarê wendegehê Ebd El-Mesîh ê bajarê Dêrikî girêdayê Kantonê Qamişloyî de şîrove kerde.

 

'Domanî heqê xo yê meşrû ra ameyê dûrvistene'

 

Mamosteya tarîxî, Sara Rusteme roja heqê domanan ya dinya pêro domanan û bi taybet domanan ke wendegehê xo dûr kewtê û va: "Ez nê rojî pêro domanan rê pîroz kena. Bitaybet domanê ke nê prosesî de heqê xo yê meşrû ra ameyê dûrvistene. Kes nêeşkeno ameyoxê nê domanan tarî bikero. Seba ke heqê domanan o ke bi ziwanê maya xo biwanê."

 

'Domanî seba hêrişan nêeşkenê şêrê wendegahan'

 

Sara dewamê qiseykerdişê xo de qalê hêrişê dewleta tirkî kerde û wina va: "Proseso ke nika ma ci ra derbaz benê zaf giran o, lazim o her kes vengê xo berz bikero û seba domanî, domanîya xo biciwîyê wirzê serê lingan. Nika xeylê domanî seba hêrişê dewleta tirkî nêşinê wendegehan, tu heqê kesêke çin o ke domanan wendişê înan ra dûr bifîno. Labelê dewleta îşxalkerdox a tirkî nê çî kena û tu kes zî vengê xo nêkeno, eksê ci hemkarîyê dewleta tirkî kenê."

 

'Ma wazenê bi hizûr welatê xo de biciwîyê'

 

Wendekara bi nameyê Zevîn Riyad û Henan Ebid El- Rehmane roja heqê domanan pîroz kerdî û wina vatî: "Ma roja heqê domanan temamê domanê dinya rê pîroz kenê. Ma wazenê bi azadî û hizur welatê xo de biciwîyê. Biomidê domanê ke wendegehê xo ra dûr kewtê ageyrê wendegahan û wendişê xo dewam bikerê."