MERKEZÊ XEBERAN - Mamostaya Zimanê Kurdî Zahra Mohammadi bajarê Sanandajî yê Rojhelatê Kurdistanî de seba ke dersê kurdî dayêne do bêra daliqnayene. Sewbîna Komarê Îslamî yê Îranî cinîya kurd ya aktivîst Serare Elugasi zî daliqna.

 

Komarê Îslamî yê Îranî Mamostaya Zimanê Kurdî Zahra Mohammadi ke bajarê Sanandajî yê Rojhelatê Kurdistanî de dersê kurdî dayêne, 23ê gulana 2019î de bi mehneya ‘Propagandaya vera dewletê’ û ‘Têgêrayîşê vera asayîşê neteweyî’ aye tepişt. Ribvar Manbari û Edris Manbari zî Zahra Mohammadi reyde ameyîbî tepiştene, labelê seba ke ê kefalet dabî serbest ameyî veradayene. Zahraye zî her çiqas ke kefalet bida zî serbest nêameye veradayene. Komarê Îslamî yê Îranî cinîya kurd ya aktivîst Serare Elugasi zî 15ê teşrîna peyêne de saet 4.30î de daliqna.

 

Waya Zahra, Kani Mohammadi ard ziwan ke waya aye Zahraye de nêweşîya loqereyan esta û seba ke ameya tepiştene dermanê aye nînê dayene. Kani Mohammadi dîyar kerde ke seba ke şert û mercê zîndanî zor î û wardê ci xeylê xirab î, Zahraye de nêweşîya made vejîyaya û madeyê aye qul bîyo.