QAMIŞLO - Îdarekara Komîteyê Cinîyan ê Têkiliyê Teberî û Hetkarîya Filîstînî Suead Evdul Rehman, seba şarê Vakur-Rojhelatê Sûrîye mesajê pêyewgirewtişî da. Sueade mesajê xo de wina va: "Ganî nê şarê Vakur û Rojhelatê Sûrîye zî sey pêro şarê bînan, wayîrê statuyêk û wayîrê heqê tayînkerdişî qederê xo bê."

 

Sueade, hêrişê tirkîya û komê girêdayê aye yê serê herême rexne kerdî û va no şerêke neheq o. 

 

Sueade dewamê mesajê xo de wina va:

 

“Hêrîşê serê kurdê vakur û rojhelatê Sûrîye bê wijdanî yê. Şarê Kurd zî sey şarê bînan bêveng kenê û pêro heqê înan destê înan ra gênê. No şar herêma Kurdîstanî ra ver bi Vakur-rojhelatê Sûrîye ra, tirkîya, başur û wextê ke ma ewnîyenê heta rojhelat, serê nê herre ciwîyenê. Ganî êdî ê zî wayîrê statuyêko xoser û heqî bê. Seba ke wayîrê kulturê tarîxî, ziwan û tekoşînêkê yê. Ganî ê zî sey pêro şaran statuyêko înan bibo û wayîrê heqî bê."