MERKEZÊ XEBERAN - Hemsereka Grûbe ya Partîya Çepe ya Meclîsê eyaletî yê Hamburgî Cansu Ozdemîr seba ke hesabê xo yê medayaya komelkî ser o alaya PKKyî pare kerde û nuşt ke 'Qedexeyê serê PKK'yî bêro wedaritene' caza dayîye ci ke 4500 euro cezaya pereyî bida.

 

Hemsereka Grûbe ya Partîya Çepe ya Meclîsê eyaletî yê Hamburgî Cansu Ozdemîre serrgêra qedexeyê PKKyî  ser o de ke Almanya faalîyetê PKK'yî kerdibi qedexe, 27ê Teşrîna Peyêna 2017 de hesabê xo yê twîtterî ser o nuşteyê "Wa qedexeyê PKKyî ser o bêro wedaritene! ForbiddenInGermany" pare kerdibi. Cansuye binê parekerdişê xo de ca daybî alaya PKK'yî ya ke verê cû hetê ajansê xeberanê Almanî DPA ra amebi parekerdene.

 

Dima tahqîqatê mehkemeya herêmîye hukum dayîya ke Cansuye 500 euro cezaya pereyî bida. La seba ke Cansuye cezaya pereyî nêdaye, cezaya ci bîye 1500 euro. Parlamenterê Partîya Çepe dewa berde temyîz û mehkeme Mehekemeya Îdareyî ya Hamburg- Altona de ameye dîyene.

 

Mehkeme hetê qelebelixeko pîlî ra ame taqîbkerdene. Cansuye bale ante ser ke sucêk nêkerdo û ganî qedexeyê PKKyî ser o bêro wedaritene. Roniştişî ra dima mehkeme qerar girewt ke Cansuye 4500 euro cezaya pereyî bida. Mehkeme qerar da ke Cansuye eke mabênê 2 serran de heman suc bika, do cezaya pereyî bida. Mehkeme Cansuye rê îfade kerd ke ganî bi rayîranê meşrûyan têkoşîn bida. Cansuye zî îfade kerd ke medyaya komelkî ser o parekerdiş rayîrêko meşrû yo û qerarê mehkeme rexne kerd. Cansuye Mehkeme de bale ante îşxalkarîya dewleta Tirkîya ya Rojawanî ser û waşt ke ganî şarê Rojawanî rê paşt bêro dayene. Cansuye îfade kerd ke qedexeyê dewleta Almanî yê PKKyî ser o wa bêro wedaritene.

 

Hukmatê Almanî serranê peyênan de ver bi sembolanê têgêrayîşê azadîye yê kurdan zaf tahqîqatî kerdî. Çimeyê nê tahqîqatan zî agahînameyê Wezaratê Karanê Zereyî yo ke 2ê Adara 2017 de pêroyê eyaletan ra ame erşawitene. Goreyê agahînameyî sere de alayanê YPG-YPJyî, PYDyî, fotografê Rayber Abdullah Ocalanî pêroyê sembolê Têgêrayîşê Azadîye ya Kurdan ameybî qedexekerdene.