HESEKÊ - Dewleta tirkî û komanê xo yê DAIŞ û El Nûsrayî reyde bînşewe ra nata bi obus, tank û teyarayanê şerî yê bêmerdimî dewanê Serêkanîyê ser o bombayan varnenê.

 

Dewanê Midbaxa, Mezrexa Mala Hemdoş, Dawudiye, Dirdara, Mubarekiye, Mirekis û Sikkeriye yê qezaya Zirganî ya Serêkanîyê şewa Yewşemeyî ra nata dagirkerî hêriş kenî. Obus û tankan û teyarayanê şerî yê bêmerdimî hêrişan de ameyî xebitnayene.

 

Dewa Mubarekîye de şervananê Hêzê Sûrîyeya Demokratîke (HSD) cewabêko pît da hêrişan û netîce de 24 çeteyî ameyî kiştene û di wesayîtê ke hêriş de ameyêne xbitnayene, ameyî îmhakerdene. Dewanê bînan de zî şer qewimîyeno û dagirkeran ra kişteyî û birîndarî estî, la netîce nêame tesbîtkerdene. 

 

Hêzanê dagirkeran xîret kerd ke bikewê dewa Midbaxî û şervananê HSDyî cewab da hêriş. Komê dagirkerî neçar mendî ke xo tepîya biancî. Heman wextî de verba dewanê Sali û Til Qertelî hêriş ame kerdene û her di herêman de zî şer qewimîyayo. 

 

Dewa Babil Xêrî de zî peynîya hewteyî ra nata şer qewimîyeno. Şerê Yewşemeyî de bi desan artêşa tirkî ameyî kiştene û tankêkê înan ame îmhakerdene.