Gulşen Koçuk

 

MERKEZÊ XEBERAN - Prof. Dr. Şebnem Korur Fîncanci îdiayê kerde ke Tirkîya vera Serêkanîyê çekê kîmyewî xebitnayî de şîrove kerd bikar û da zanayîş ke ganî tehqîqatêke bandor bêro kerdene, delîl bêrê komkerdene, cil û belgê binî kontrolê kîmyewî de bêrê derbaskerdene.

 

Çarçeweya hêrişê ke Tirkîye 9ê teşrîna verêne de hemver Vakur û Rojhelatê Sûrîye da destpêkerdiş de ame îdia kerdene ke 16ê teşrîna verêne hemverê Serêkanîyê çekê kîmyewî ameyo xebitnayene. Her çiqas hetê her di hetan ra 17ê teşrîna verêne de adirbest ame meydan zî Tirkîya hêrişê xo Serêkaniyê de dewam kena.

 

Sivîlê ke hêrişan ra tesîr bîyê bedenê înan veşa û nêweşxane nika yenê dermankerdene. Yeno vatene ke rewşa xeylê birîndaran giran o. Sereka Pêroyî ya Weqfa Heqê Merdiman ê Tirkîya (TÎHV) û Pispora Tipê Edlî Prof. Dr. Şebnem Korur Fîncanci rewş şîrove kerd.

 

'Gerek delîlî bêrê komkerdene'

 

Şebneme da zanayîş ke seba cewabêke zelal bêro dayene ganî şewat û cil û belgan ra nimûne bêro girewtene û va: "Tena bidîmenan merdim nêeşkeno çîyêk vajo. Seba babete biba tesdîqkerdene ganî serê cil û belgan de kontrolê kîmyewî bêro kerdene. Ganî na babete de cigêrayîşêke bi tesîr bêro kerdene. Delîl bêrê girewtene. Cilî bêrê kontrolkerdene.”

 

Doktorê herêma Vakur û Rojhelatê Sûrîye birîndaran derman kerdî, diyar kerdibî serê birîndaran daneyê ke verê qet nêdîyê, rast ci ameyê û dîyar kerdibî ke no beno ke çekê qedexekerdeyê yenê xebitnaye û seba bêro tespîtkerdene zî do cigêrayîşêke hîra bikerê.