HESEKÊ - Dewleta tirkî bi hêrişanê xo yê serê herêma vakur û rojhelatê Sûrîye bîye sebebê mergê xeylê sivîlan. Badê hedefnîşandayîşê sivîlan na reye endamê Heyva Sor a Kurdistanî bîyî hedefê hêrişan.

 

Şewa verên saet 11.30îde artêşa dewleta tirkî endamanê Heyva Sor a Kurdistanî kerde hedefê hêrişan. Netîceyê hêrişî de 4 endamê Heyva Sor a Kurdistanî birîndar bîyî. Wexto ke endamê Heyva Sor a Kurdistanî verê xo danî Serêkanîyê ke wezîfeyê xo yê merdimîye û wijdanî bîyarî ca û biresî hawara birîndaran, benî hedefê hêrişan.

 

Sewbîna ame zanayene ke vizêr qirkerdişêk vera sivîlanê Herêma Cizîrî de pê ameyo û endamê Heyva Sor a Kurdistanî wexto ke şîyî hatkarîya şarê Serêkanîyê hetê teyareyanê şerî yê dewleta tirkî ra ameyî bombardûmankerdene û netîceyê hêrişî de xeylê sivîl û birîndarî şehîd bîyî.