MERKEZÊ XEBERAN - Neteweyê Yewbîyayeyî da zanayene ke seba ke heta serra 2030 koledarî bêra qedînayene ganî her roje 10 hezar merdimî koledarîye ra bêrê azadkerdene. Goreyê Neteweyê Yewbîyayeyî dinya de 40 mîlyon merdimî kole yê.

Raportora Taybet a babeta koledarîye ya Neteweyê Yewbîyayeyî Ûrmîla Bhoola bi eşkerayîyêk da zanayene ke  peynîya şeş serran ê wezîfeyê xo de a bixemgînî pare kena ke seba ke koledarîye wedarê rayîrê înan hema zî dûr û derg o.

 

Ûrmîla ard ziwan ke heta serra 2030 seba ke koledarîye dinya ra wedarê ganî zêdêr karî bêrê kerdene û naye ra ganî rojêke de 10 hezar merdîmî bêrê azadkerdene. Ûrmîla raporêk pêşkêşê Konseya Heqê Merdiman ya Cenevre kerd û da zanayene ke dinya de 40 mîlyon merdimî binê şert û mercanê koledarîye de yê û beno ke na hûmare hîna zêde biba. Goreyê raporê Ûrmîla dinya de se ra 64 koleyî hetê sektoranê taybetan ra yenê xebitnayene. 

 

Heman wextî de çar baran ra yewê înan zî doman ê. Cinîyê binê şert û mercanê koledarîye de yê se ra 98 benê hedefê şîdetê cînsîyî. Rapor de ame eşkera kerdene ke 24 mîlyon gêncê ke welatanê averşîyayen û kêmaverşîyan de kewenê karî, beno ke bikewê binê şert û mercanê koledarîye. Goreyê raporî welatê Neteweyê Yewbîyayeyî ganî lezûbeze verba na rewşe de tê bigêrê.