STENBOL- Koma Cinîyî Pîya Xurt ê,  verba şîdetê serê cinîyan kampanyayêka bîne daye destpêkerdene. Na kampanya do 2 mengî dewam bika.

 

Koma Cinîyî Pîya Xurt ê ya ke zafê rêxistinê cinîyan û cinîyê xoserî tede ca gênê bi nameyê 'Hînî tehamulê ma nêmend ke ma xeberanê cinîyan biwanê' dest pê kampanyayêk kerde.

Na kampanya do heta 25ê Teşrîna Peyêne ya Roja Têkoşînê Verba Şîdetê Serê Cinîyan dewam bika. 

 

Çalakîya verêne 28ê Êlule de do Kadikoy de bêra viraştene. Emîne Bûlûte ra heta Hande Kadere do hîkayeyê 100 cinîyan bêrê wendene. Na çalakîye do 28ê Êlule de saete 14.00 de Kadikoy de bêra viraştene. Rêxistinanê cinîyan eşkera kerd, ê seba ke vera sîstemî sere wedarê do bêrê pêser. 

 

Cinîyan wina veng da: “Her çiqas paştê kiştoxan yenê tepiştene û vanê 'Nêbeno ke merdim debikewo mabênê cinî û camêrdan' zî seba ke şîdet destê camêrdan ra yeno vilabîyayene, seba ke cuyêka verba şîdetî bêra sazkerdene, seba caardişê Peymana Stenbolî ti zî bê.”