MERKEZÊ XEBERAN - Fonê Domanan ê Neteweyê Yewbîyayeyan (UNICEF) da pêhesnayene ke Yemen de di mîlyon domanî nêeşkenî şirê wendegeh, înan ra nêm mîlyonî zî Adara 2015î ra nata wendegeh ca verdenê.

 

UNICEFî bi wesîleya destpêkerdişî ya temrîno newe yê perwerdeyî yê Yemenî de îzehetêk weşana û da zanayene ke di mîlyon domanî nêeşkenî şirê wendegeh.

 

Goreyê UNICEFî seba ke di serran ra nata meaşê mamostayan nênê dayene, perwerdeyê 3.7 mîlyon wendekarî zî rewşêka biqesawete de yo.Temsîlkara UNICEFî ya Yemenî Sara Beysolow Nyante vat, "Şîdet, koçkerdiş û hêrişî benî sedem ke zafê domanî nêeşkenê şirê dibistan. Seba ke di serran ra zêdêr meaşê mamostayan nênê dayene senînîya perwerdeyî zî binê rewşêka biqesawete de yo."

 

Şerê Yemenî sîstemê perwerdeyî mehf kerd. Her panc wendegehan ra yewî wina bîyo ke hînî nênê xebitnayene.