AMED - Rojnameger û nuştoxo kurd Mûsa Anter cayo ke ame qetilkerdene de ame yadkerdene Rayberîya Înîsîyatîfê Çapemenîya Azade de rojnamegeran, temsîlkaranê dezgehanê demokratîke û partîyanê siyasî, Mûsa Anter Seyrantepe ya Amedî de ke cayo tede ame qetilkerdene de yad kerd.

 

Rojnamegeran rayberîya Însîyatîfê Rojnamegeran ê Azadan (OGÎ) de parlamenteran, hemserekan, îdarekaranê Partîya Demokratîke ya Şaran (HDP), Meclîsê Dayîkanê Aştîye, Tevgerê Cinîyanê Azadan (TJA), temsîlkaranê Komeleya Heqê Merdiman (ÎHD), Komeleya 78an, Baroya Amedî û zafê dezgehanê bînan de nuştox, roşnvîr û rojnameger Mûsa Antero ke 20ê Êlula 1922yî de Seyrantepe de hetê JÎTEMî ra ame kiştene yad kerd. Rojnameger û temsîlkarê rexistinan ê komelkîye û demokratîk fotografê rojnamegeran ê ke 1990an de ameyî qetilkerdene kiriştî. Qerenfîl û gulî kerdî ra û kiştê peykerê Mûsa Antarî de o yad kerdo. Ewil qiseykerdoxê Înîsîyatîfê Çapemenîya Azade Hakki Boltanî qisey kerd û va: “27 serrî derbas bî. La hema zî kiştoxî nêameyî roşnkerdene. Ne teyna Apê Musa, kiştoxê rojnamegeranê bînan zî nêameyî roşnkerdene. Ewro wendekarê Mûsa Anterî wayîrê ci vejenî û no tradîsyon dewam keno. Ma Apê Musa qet xo vîrî ra nêkenî û ma pê têkoşîn û keda ey rayîrê xo roşnî kenî. Ma do qet qelema ey ser erdî nêronê.”

 

Hemşaredarê Amedî Adnan Selçukî zî ard ziwan ke o zaf bisiûd o ke Apê Mûsa şinasnayêne û wina va: “Ez zaf bisiûd a ke mi Apê Mûsa şinasnayêne. Werrekna mi o hîna rew bişinasnayêne.”

 

Lajê Apê Mûsayî Dîcle Anterî zî îfade kerd ke seba ke bi babîyê ci 'bi kurdkî fîtik cinitêne' ame destbendkerdene û ewro zî na rewşe dewam kena. Kultur û ziwanê kurdkî yeno qedexekerdene. Anterî ard ziwan ke ewro bi seyan merdimê ke ey taqîb kenî tewirê ey reyde dewam kenî û ê bi nê kêfweş ê.

 

Rojnameger û temsîlkaranê rexistinan ê komelkîye dimayê qiseykerdişan şî cayo ke Mûsa Anter uca de ame qetilkerdene. Koman rayşîyayîş de sloganê 'Çapemenîya azade nêna bêvengkerdene.' vat. Komî dimayê qernefîl û gulî verda cayê Mûsa Anterî ke uca de ame qetilkerdene, vila bî. Komêkê rojnamegeran zî seba zîyaretkerdişê mezelê Mûsa Anterî şî dewa Stilî ya qezaya Nisêbînî.