MERKEZÊ XEBERAN - Hemverê reformê teqawitîye yê hukmatê Fransa de girseyêko gird virazîyeno. Avûkat, pîlot, hostes û doktorî sere de xeylê karker û xebatkarî ewro vejîyenî raşteyan.

 

Hukmatê Fransa wazeno ke sîstemê teqawitîye bibedilno. Xebatkarê meslekê serbestî zî fikarinî ke do awantajê xo yê teqawitîye dest vindî bikerî. Seba reaksîyon nîşandayîşê sîstemo newe yê hukmatî avûkat, pîlot, hostes û doktorî sere de xeylê karker û xebatkarî do ewro saet 13.00î de Raşteyê Operayî de rayraşîyayîşêk bivirazî. 

 

Verê rayraşîyayîşî kolektîfeko gird ame awankerdene. Kolektîfî de 14 meslekê cîya-cîyayî estî. Kolektîfê bi nameyê SOS Retraîtesî va: “Tarîxê no welatî de reya yewino ke avûkat, xebatkarê weşî û karkerê hewayî hemverê no projeyêk de pîya rayîr şonî.”

 

Roja Îne zî Parîs de grevêk ameybî kerdene. 12 serranê peyênan de reya yewino ke grevêko winasî yê gird yeno kerdene. Hukmat dîyar kerd ke do pêşnîyazê bedilnayîşê sîstemê teqawitîye serrêka bîn bêro meclîs û ê hewl danî ke vindetişê hemverê bedilnayîşî bêro nermkerdene, labelê nika ra xeylê çalakîyî ameyî kerdene. 

 

Sendîkaya FO seba çalakîya 21ê êlule venge daye û yeno pawitene ke tevgerê sendîkayî yê bingeyî 24ê êlule de xo bida dîyarkerdene. CGT, Solîdaîres û FSÛ zî vengê çalakîye kerdî.