AMED - Rayîrberê MED-DERî Sedat Baranî dîyar kerd ke Serra Perwerdeyî û Musnayîşî ya 2019-2020î seba domananê kurdan prosesêko asîmîlasyonî yê newe ya û vengê ‘wayîrê ziwanê xo vejîyenî’ da heme kurdan.

 

Komeleya Cigêrayîşê Ziwanû Kulturî ya Mezopotamya derheqê Serra Perwerdeyî û Musnayîşî ya 2019-2020î de awanîya Kongreya Komela Demokratîke (KCD) de kombîyayîşê çapemenş viraşte. Rayrberê MED-DERî Sedat Baranî da zanayene ke perwerdeyê serra newe seba domananê kurdan prosesêko asîmîlasyonî yê newe ya û vengê ‘wayîrê ziwanê xo vejîyenî’ da heme kurdan

Sedatî qiseykerdişê xo de dîyar kerd ke awanbîyayîşê komarî ra heta ewro polîtîkayê înkar û asîmîlasyonî ziwanê kurdî ser de qet kêmî nêbîyî û cok ra ziwanê kurdî tena sey ziwanêk qiseykerdişî ameyo sînorkerdene. Sedatî ard ziwan ke problemê ziwanî bi netew dewletî dest pêkerdo û wina dewam kerd: “Dewlet bi yew ziwanî polîtkayê xo rayîr bena. Na rewşe bena sebebê çinkerdişê ziwanî.”

 

‘Lazim a her kurd wayîrê ziwanê xo bivejîyo’

 

Sedatî qiseykerdişê xo yê peyênan de da zanayene ke ziwan ganî yo û her tim bîyayîşê xo paweno. Sedatî bale ant perwerdeyîyê ziwanê dayîkî yê hetê pedagojîk ser û wina qedêna: “Wexto ke bêro qiseykerdene do timî ganî bimano û nêro çinkerdene. Doman fekê berê mekteban de fek ziwanê kurdî ra vera danî. Keye de tirkî tercih kenî. Wexto ke na rewşe pê yena prosesê otoasîmilasyonî keweno dewre. Eke ziwanê kurdî bibo ziwanê perwerdeyî do ziwan ganî bibo û aver şêro. Ma do ziwanê xo însafê Wezîrîya Perwerdeyî yê Neteweyî rê vera nêdî. Fehmê sîyasî yê her kurdî çi beno wa bibo ganî wayîrê ziwanê xo bivejîyo.”