MERKEZÊ XEBERAN - Seranserê Ewropa de cinîyê Kurdan çarçeweya hemleya ‘Seba azadîye û vurayîşî ti zî wirze payan ser’ vejîyayî kuçeyan û şîdetê serê cinîyan, mîlîtarîzm, îşxalkarîye û qeyûmî protesto kerdî.

 

Xeylî bajaranê Ewropa de cinîyê Kurdanê ke bi şîarê ‘Seba azadîye û vurayîşî ti zî wirze payan ser’vejîyayî kuçeyan, mîlîtarîzm, îşxalkarîye û qeyûmî protesto kerdî. Çalakîyan  de xespkerdişê şaredarîyanê hîrê bajaranê pîlan ê HDP’yî ameyî protestokerdene û mesajê xurtkerdişê xoverdayîşî ameyî dayene.

 

Koln: Bajarê Kolnî yê Almanya de çarçeweyê hemleye de cinîyî vejîyayî kuçeyan hêrişî vera cinîyan û hêrişê dewleta Tirkî yê vera Kurdan protesto kerdî.

 

Stuttgart: Bajarê Stuttgartî de zî bi heman waştişî cinîyî kuçeyan de bî. Çalakîyê de xespkerdişê şaredarîyanê Amed, Wan û Mêrdînî ame protestokerdene.

 

Frankfurt: Bajarê Frankfurtî de zî hetê YJK û Cinîya Newî ra çalakîyêk ameye organîzekerdene û qeyûmî ameyî protestokerdene.

 

Mannheîm: Bajarê Mannheîmî de zî bi çalakîyêk qeyûmê vera şaredarîyanê Kurdan ameyî protestokerdene.

 

Kopenhag: Paytextê Danîmarka Kopenhag de zî rayberîya Meclîsê Cinîyan ê Seve de çalakîyêk ameye viraştene û şîdet û qeyûmî ameyî protestokerdene.

 

Basel: Bajarê Baselî yê Swîsre de zî bi vengdayîşê Yewîya Cinîyan ê Swîsre û Komîteya Rojawanî rayraşîyayîş û mîtîng ameyî viraştene.

 

Luksemburg: Luksemburg de zî cinîyî vera şîdet û hêrişê dewleta Tirkî yê vera şarê Kurdî kuçeyan de bî.Çalakîye de mesajê xurtkerdişê mucadeleyî ameyî dayene.

 

Roma: Paytextê Îtalya Roma de zî çalakîyêka komînîstan organîze kerdebî  Kurdî zî tewrê ci bîyî û qeyûmî protesto kerdî.

 

Torîno: Bajarê Torîno yê Îtalya de zî hêrişê îşxalî yê dewleta Tirkî yê vera Kurdîstan, bombardûmanê înan û derbeya qeyûmî ameyî protestokerdene.

 

Parîs: Paytextê Fransa Parîs û bajaranê Bordeaux û Rennes de zî vera şidet serê cinîyan û polîtîkaya hêrişkare ya dewleta Tirkî ya ke vera Kurdan yena caardene ameyî protestokerdene.

 

Stockholm: Paytextê Swêdî Stockholm de zî rayberî Meclîsê Cinîyan ê Amara de çalakîyêk ameye viraştene.  Çalakîyê de hêrişê dewleta Tirkî yê vera Kurdan ameyî protestokerdene.