MERKEZÊ XEBERAN - Goreyê raporê Meclîsê Ewleyîya Kar û Weşîya Karkerî (ÎSÎG) yê aşma tebaxe 148 cînayetê serê karî pê ameyî û 8 aşmanê emserî de pêropîya hezar û 174 karkerî cuya xo vindî kerdî.

 

Meclîsê Ewleyîya Kar û Weşîya Karkerî (ÎSÎG) raporê xo yê aşma tebaxe yê derheqê cînayetanê karî de eşkera kerd û goreyê raporî 148 karkerî aşma tebaxe de cuya xo vindî kerdî. Goreyê raporo ke ameyo eşkerakerdene mîyanê karkeran de 14 heb doman, 12 heb cinî û 11 heb zî koçberî estî. Cinîyê ke cuya xo vindî kerdî karkerê berardişî yî û sewbîna cînayetê serê kar tewr zêde raşteyê weşî û resnayîşî de pê ameyî.

 

Raporê ÎSÎGî de ame vatena ke 41 karkerî bi heqdest xebetîyayêne û pêrpîya 68 karkerê demserrî bîyî qurbanê cînayetê serê karî. Goreyê dayeyanê aşma çele 159, aşma sibate de tewr kêmî 127, aşma adare de 114, aşma nîsane de 153, aşma gulane de 164, aşma hezîrane de 131, aşma temmuze de 178 û aşma tebaxe de zî 148 karkerî cuya xo vindî kerdî. Pêropîya 8 aşmanê serra 2019î de tewr kêmî hezar û 174 karkerî bîyî qurbanê cînayetê serê karî. Goreyê raporê ÎSÎGî tena 2 karkerî sendîkayî tede estbî û 148 karkerî bê sendîka kar kerdêne.