DÊRSIM - Dêrsim de Platformê Cinîyan reaksîyon nîşanê qetilkerdişê Emîne Bulute da û da zanayene ke ganî Pêkerdişê Stenbolî û Qanûnê Pawitişî yê 6284 bikewî dewre.

 

Emîne Bulute 18ê tebaxe de bajarê Kirikkale de verê çimanê domana xo de bi hawayo wehşane ameye qetilkerdene. Vizêr Platformê Cinîyan yê Dêrsimî ver qetilkerdişê cinîyan de rayîrşîyayîşêk organîze kerd û badê rayîrşîyayîşî eşkerayîyêk da çapemenîye. Cinîyî Raşteyê Hunerî de arê bîyî û heta Raşteyê Seyîd Rizayî rayîr şîyî. Çalakîya rayîrşîyayîşî de pankartê ‘Ma nêwazenî bimirî’ ameye akerdene. Nameyê platformî ser Tuba Apaydine eşkerayî daye.

 

Tubaye dîyar kerde ke netîceyê sîstemî de cinî yenî qetilkerdene, şîdetî reyde rî bi rî manenî û wina dewam kerde: “17 serrî yo ke ma vanî ‘Ma nêverdenî ke no welat de cinîyî bêrî qetilkerdene, ma do qanûnanê xo bikerî dewre, ma nêverdenî ke cinî şîdetî reyde rî bi rî bimanî û ma qetî camêrdan heqdar nêvînenî’. No sîstem bî sebebê qetilkerdşê Emîneye. Ma qetî qêrayîşê Emîneye xo vîra nêkenî. Ma do heqê cuye timî bipawî. Ma xo vera prensîpanê keyeyî bivejîyî.”

 

Cinîyan badê eşkerayî çalakîya roniştişî pê ardî.