STENBOL - Muxabira Ajansê Mezopotamyayî Berfîn Aslan û xebatkarê Rojnameyê Yenî Yaşamî Mehmet Şahîn zî mîyan de 11 kesê ke vizîr Kadiyoyî seba protestokerdişê qayûman, hetê polisan ra ameybî tepişnayî, do mîyanê roje de sewqê edlîye bêrê kerdene.

 

Meclisê Ciwanan ê Partîya Demokratîk ê Şaran (HDP) vizîr qezaya Kadikoy ê Stenbolî, waştibî bi eşkarîyêke tayînkerdene qayûman ê serê şaredarîyê bajarê pîl ê Amed, Mêrdîn û Wanî, şermezar bikerê. La polîsan mudaxaleyê eşkarîye kerdî û muxabira Ajansê Mezopotamyayî Berfîn Aslan û xebatkarê Rojnameyê Yenî Yaşamî Mehmet Şahîn zî mîyan de 11 kesî tepişnayî. Yeno pawitiş ke her 11 kesê tepişnaye de ewro mîyanê roje de sewqê Edliyeya Anadolûyî ya qezaya Kartal ê Stenbolî bêrê kerdene.

 

Kesê ke ameyî tepişnayîş nameyê înan wina yo: Ûmût Akgul, Gamze Taşçi, Selda Erbîl, Îlayda Çalasin, Melek Andan, Rojen Zaman, Berfîn Aslan, Mehmet Şahîn, Metîn Yilmaz, Volkan Atmaca û Perîhan Erkilinç Okay.