MÊRDÎN - Merkezê Cinîyan ê Rewşan wexto ke  Şaredariya Şemrexî hetê qayûmî de amebi padene, hetê cinîyan ra reyna do xizmet rê bêro akerdene. Endama Meclîsê Şaredarîya Şemrexî Fehîme Hamarate da zanayîş ke do demêke kilm de sazgeh abikerê û dest bi xebatan bikerî.

 

Dimayê OHALî bi KHKyê ameyî îlankerdene dir, qayûm tayînê şaredariyê DBPî ameyî kerdene û qayûmê ke ameyî tayînkerdene zî vernê de sazgehê cinîyan ê şaredariyan padayî, mudirîyê cinîyan fes kerdî. Weçînayîşê 31ê Adare de şaredarî reyna kewtî destê HDPyî û senîn HDP ame ser wezîfe sazgehê ke ameybî padayene newe ra ameyî akerdene.

 

'Cinîyan hîrê serrî xizmet nêvînayî'

 

Endama Meclîsê Şaredarîya Şemrexî Fehîme Hamarate da zanayîş ke seba merkez newe ra abikerî dest bi xebatan kerdê û wina va: "Hîrê serrî verê senîn qayûm ame sazgeh padayî. Name vurnayî û qaşo kerdî kitabxane. La hîrê serrî padaye mend. Wextê ma de uca qurs ameyne dayene, merkez pirrî cinî bî. Bi cinîyanê dewijan dir têkilîyê ma estbî. Dimayê qayûm sazgeh ameyî padayîş û cayêke cinî şêrê nêmend."

 

'Ma do wextêk kilm de dest bi xizmet bikerî'

 

Fehîmeye tewr peyîn qiseykerdişê xo de arde ziwan ke înan newe ra seba xizmetê şarî dest bi xebatan kerdê û wina va: "Senîn ma dest pêkerd, karê me yê ewil çalakkerdene sazgehan bi. Girêdayê nê ma koperatîf awan kerd û ma do ameyox de xeylê çîyê cîya bikerê. Nika ma merkezê xo akerd û ma do dest bi xebatan bikerê. Merkez xeylê texrîb bîyo. Ma do boyax bikerê û dest bi xebatan bikerê”