KAYSERÎ - Kayserî de verê 8 serran domanêk vindî bibî. Vejîya raşte ke domana vindîbîyaye ameya qetilkerdene û cenazeya aye ameya nimitene. Versucê qetililê Merve Koçere E.K.yî badê 8 serran ame tepiştene.

 

Kayserî de serra 2011î de domana bi nameyê Merve Koçera (17) ke keyeyê xo ra vejîyaye û aye roje ra nata tu xebere aye ra nêameye girewtene. Vindîbîyayîşê Merve ra dima dayîka aye Ebru Çelene şîye Mudirîya Asayîşî ya Melîkgazîye û muracat kerde.

 

Mudirîyeta Buroya Cînayetî netîceyê cigêrayîşanê ke 2 serrî verê daye destpêkerdene de versuc E.K. û datîzayê ci M.K.(37), M.K.(30), N.K. (28), Y.K. (32) û Y.K.yî (34) operasyonêke da destpêkerdene de tepişte.

 

Badê cigêrayîşê versucan yê 3 rojan ke emnîyet de dewam kerd, 6 kesî sewqê edlîye ameyî kerdene û E.K.yî ame tepiştene. 5 kesê bînî zî serbest ameyî veradayene.