Şêrîn Zêrevan - Rojda Seyidxan

 

QAMIŞLO - 5 otobûsê neweyî yê şaredarîya Qamişloyî kewtî xizmetê şarî. Bi taybetî cinî bi ameyîşê otobûsan kêfweş ê û vatî: "Ameyîşê otobûsan problemê ma yê rayîr çareser bikero û ma do hîna rehet şêrê bajar."

 

Nê wextê peyînan de problemê şarî yê rayîr zaf bî, zafê karmend, wendekar û her çî bîn karê xo ra erey mendêne. Şaredarîya Bajarê Qamişloyî seba çareserîya nê probleman, 5 otobûsê pîl kewtî xizmetê şarî. Otobûs serê siba saete 07.00an de dest pêkerd û heta 20.00an xizmet danê. Cinîyê ke Qamişlo de cuyenê qalê xizmetê otobûsan kerdî û va: "Ma kêfweşê ke şaredarîya şarî seba şarê herême projeyê bi nê rengî aver benê."

 

'Karê ma asan bi'

 

Zekiya Cemîl welatîye Qamişloyî ya û dîyar kerde ke zaf kêfweşê û wina va: "Êdî rayîr verê ma asan bi. Verê ke otobûs çinbi ma bi xeylê probleman dir rî bi rî mendêne. Nika ma kam dem biwazê ma do karê xo tebera rehet bikerê û bi lezgîn biresê cayê xo."

 

'Wa projeyê bi nê rengî bêrê zêdekerdene'

 

Esiya Salime her roj mîyanê zehmetîyan de verê xo dayne karê xo û wina qisey kerde: "Wexto ke siba wiştine, ma cinî kom bîne û benda otobûsan mendêne. Seba ke ma şêrê bazar û lazimîyê xo bîyarê. Nika ma eşkenê rehetî karê xo bikerê. Ma umîd kenê ke projeyê bi nê rengî tewr bêrê zêdekerdene û xizmet bidê welatîyê feqîran."