Şêrîn Zêrevan - Rojda Seydxan

 

QAMIŞLO - Îdarekarê beşê weşîye Weqfê Cinîyanê Azad ê Rojawanî bi amancê ayakerdişê cinîyan ê derheqê zayîşê sezeryanî û tebîî dest bi xebatan kerd. Weqfê cinîyan bi semîner, sinevîzon û kombîyayîş cinîyan îqaz kerd.

 

Mîyanê komelî de hûmara zayîşê sezeryan zêde bîyo, no zî tesîrêke negatîf serê psîkolojîyê cinî û domanan keno. Bi nê amancê Weqfê Cinîyanê Azad ê Rojawanî dest bi îqazkerdişê cinîyan kerd. Derheqê babete de Îdarekarê beşa weşîye ya Weqfê Cinîyan ê Azad Şîlan Belo û hemşîreya cinîyan Melka Hesafe ajansê ma rê qalî kerde.

 

'Tesîrê zayîşê sezeryanê nêzanê'

 

Şîlan Belo bale ante serê lazimîyê cinîyan bi hemleyê îqazkerdişê seba zayîşê sezeryanî û wina va: "Sera 70ê cinîyan nê wextan de bawerîya înan bi zayîşê sezeryan tewr zêde yo. Seba ke tesîrê zayîşê sezeryanî nêzanê. No hemleyê ke ma da yo destpêkerdene de ma do bi rayîrê kombîyayîş, biroşûr, sinevîziyon û semîneran xo biresnê cinîyan û tesîrê tewirê zayîşê cinîyan rê neql bikerê."

 

'Zayîşê sezeryanî tesîrê negatîf serê cinîyan de keno'

 

Hemşîreya zayîşî yê girêdayê Weqfê Cinîyanê Azad ê Rojawanî Melka Hesafe zî sebebê zafbîyayîşê zayîşê sezeryanî wina ard ziwan: "Mayê verê domanê xo tebîî ardêne dinya. La nika seba tesîrê kapîtalîzimî cinîyê ke domanan anê dinya nêwazenê fîzîkê înan xirabibo. Wexto ke cinî domananê xo bi tebîî anê dinya, mîyanê di rojan de dejê ci şino û dima ra hîna rehet şit danê domananê xo. Eynî wextî de tewr zêde domane/î ra hes kena. Cinîya ke zayîşê sezeryanî dir domane/ê xo ana dinya nêeşkena bilez şit bido domane/ê xo. Heta 15 rojan bedanê maya aye baş nêbeno û nêeşkena hereket bikero."

 

Melkaye qiseykerdişê xo wina qedêna: "Umîd kena na hemle tesîrêke cinîyan bikero. Cinî zayîşê tebîî û sezeryanî baş nas bikerê. Tesîrê ci serê bedenê xo tewr baş fam bikerê. Seba ke weşîya xo bipawê."