AMED - Rojê Tîyatroyê Domanan ê Gêrayoxî yê ke hetê Şaredarîya Bajarê Girdî ya Amedî ra yenê organîzekerdene û do hewteyêk dewam bikerê bi eleqedarîyêka pîle dest pêkerd.

 

Rojê Tîyatroyê Domanan ê Gêrayoxî yê ke hetê Şaredarîya Bajarê Girdî ya Amedî  ra yenê organîzekerdene dest pêkerd. Aktîvîteya tîyatroyî ya ke vizêr şan de Bismil û Erganî de dest pêkerd, bi eleqedarîyêka pîle amî pêşwazîkerdene.

 

Parkî Gençlîkî yê Erganî de Kûkla ya Mîrçikê Bêzerfî (Zarfsız Kuşlar) û pandomîmê bi nameyê Çîyo ke Mîmdo Cigêreno (Mimdo’nun Aradığı), bi pêramotişê jonglorî yê performansê Bîngoyî û kayê tîyatroyî yê Sê Ezezokî yê Tîyatroyê Bajarî yê Amedî resayî temaşekaran.

 

Parkê Kardeşlîkî yê Bismilî de zî pêramotişê mîmî yê Begum Ateşe yê Balona Sipîye (Beyaz Balon), pêramotişê jonglorî yê Erturk Erkekî û Qeşmer û Peşmer ê Komalê Vera Dêsî yê Tîyatroyî resayî temaşekaran.

 

Hemserekê Şaredarîya Bismilî Orhan Ayazî, endamanê meclîsî verê kayo ke domanî û keyeyê înan tewrê ci bîbî rîyê domanan boyax kerdî. Saetanê averî de parko ke tede kay ameyêne kaykerdene reyêk de bi domanan bi pir. Domanî bi çepik, huyayîş û fîkayîşan tewrê pêramotişanê tîyatro, pandomîm û jonglorî bîyî, rîyê înan ra peşmîrîyayîş qe kemî nêbi. Tîyatroyo ke hetê pîlan ra zî ame temaşekerdene bi çepikan qedîya.

 

Pêramotişê tîyatroyî do merkezê Amedî û qezayanê ci Yenîşehîr, Kayapinar, Karaz, Gêl, Pîran, Çinar, Hezro, Farqîn, Licê û Pasûr de biresê temaşekaran. Her roje 2 qezayan de do rojê tîyatroyî bêrê organîzekerdene, 26ê temmuze de biqedîyê.