MÊRDÎN - Tedayê Zindanê Tîpê T yê Osmanîye her ke şinê zêde benê. Merdimê hepsî Şukriye Engîne babete ser o qisey kerde û da zanayîş ke vera îhlalkerdişê heqan ganî STK û avûkatî şêrê zindan û ganî raya pêruyî vera nê çîyan bêveng nêmanê.

 

Zindanê Tîpê T yê Osmanîye ke her wext çapemenî de bi xeberê teda û îşkence rojev de ca gêno, ame zanayîş ke dimayê grevê vêşanîye hepsî nêameyê dermankerdene. Eynî wextî de ame vatene ke her wext cezayê dîsîplînî yenê dayene, cezayê hucreyî yenê dayene, radyoyê hepsîyan yenê desteserkerdene û 3 mengî ya mektube înan nîna dayene.

 

'Hepsî nêameyî dermankerdene' 

 

Şukriye Ergîne da zanayîş ke lajê aye Faruk Engîn dewaya Nisêbînî 4 serrî zindanê Osmaniye maneno û rastê her tewir îşkence ameyo. Şukrîye wina va: "Lajê mi û hepsîyê bîn dimayê grev ra vejîyayê, berdê nêweşxane la waştê bi kelepçe derman bikerê. Hepsîyan nê qebûl nêkerdê û dima ra ardê zindan. Nika lajê mi çi weno virêceno. Zaf kîlo dayo. Nika rewşa înan tewr xirab a. Pêvînayîşê peynî de va rewşa hepsîyê ke giran estê. Ganî ê zî bêrê dermankerdene. La kes seba înan çîyêke nêkeno. Roja ke lajê mi berdê ûca yeno derbkerdene û kenê hucreyê yew kesî.”

 

'Teda roj bi roje zêde benê'

 

Şukrane arde ziwan ke radyoyê înan yenê desteserkerdene, rojname nînê dayene û wina va: "Wextê grevan de radyoyê înan ameyî girewtiş. Nika cil-belg û hacetê înan zî gênê. Mektubê ke ma eşrawenê nêdanê ma. Mektubê înan zî 3 mengan zindan de danê vindarneyene. Kam veng vejeno zî cezaya hucre û dîsîplînî danê înan. Ganî STK û huqûqnas şêrê zindanan. Ganî pêro raya pêruyî vera nê bêveng nêmanenê. Ma veng bidê zindanê ûca."