MÊRDÎN - Cinîya bi nameyê Meles Tekîna ke seba cezaya tesdîq bibî amî tepiştiş û serrêke û 3 aşmî yo zindan de ya seba nêweşîya xo nêeşkena rayîra şêro. Wezaretê Dade seba Melese va ‘eşkena zindan de bimano' û muracatê avûkatan ê ‘serbestveradayîşê bi kontrol’ zî her wext yeno redkerdene.

 

Meles Tekîna 74 serrî Mêrdîn de bi sebebê 4 serrî û 2 mengî cezaya aye ameya tesdîqkerdene Nîsana 2018an de amî tepiştiş û eşrawitî zindan, dima ra zî surgunê zindanê Xarpêtî amî kerdene. Melese seba problemê ke cuyena her wext benê revîr û seba raporê Sazgehê Tipê Edlî (STE) 4 rey waştişname da. Melese raporê xo yê nêweşxaneyî zî eşrawit û wezaretê Dade her rey cewabê 'eşkena zindan de bimana' da. Melesa ke serrêke û 3 mengî yo tepişnayîya rewşa aye her ke şina xira bena û êdî nêeşkena rayîra şêro.

 

Melesa ke vernê de sewqê Edeneyî kerdî, raporê STEyî 5 mengî dima menga teşrîna verêne 2018an de risa zindan. Rapor de ame vatene ke ‘eşkena zindan de bimana.' Raporo ke ame amadekerdene de, muracatê avûkatan ê ‘serbest veradeyene bi kontrol’ û ‘hepsê keyeyî’ ame redkerdene. Avûkatan seba îtîrazî zî muracat kerdî la o zî ame redkerdene.

 

'Seba ke nêeşkena rayîra şêro bi asansore benê'

 

Melesa ke lazimiyê xo yê rojane bi piştdayîşê embazanê xo yê koguşî kena, nêweşîya aye qelbî, sîne, tansiyon û şekir esta. Her wext tansiyonê aye berz bena, di rojan reyke vejîyena revîr û bedenê aye de masnayîş virazyayo. Amîna Tekîna ke rojê vîyarte de şî pêvînayîşê maya xo, dîyar kerde ke rewşa maya aye her ke şino xirab beno û wina va: "Moralê aye zî sey verê nîyo. Serrêke û 3 mengî yo tepişnayeya. Xeylê nêweşîyê aye estê. Nêeşkena werdê xo boro. Nêeşkana biewno xo ra. Embazê aye hetkarî kenê. 4 rey raporê xo eşrawit Enqere. Tewr peyîn parçe aye ra girewtî. Rewşa aye baş nîya. Nêeşkena ti lazimîyê xo bi ca bîyaro. Hepsî nanê aye danê û sereyê aye şonê."

 

'Wexto ke berdê nêweşxane destê aye kelepçe kerdê'

 

Amînaye tewr peyîn wina va: "Destê maya mi zerd bibî û lerzayne. Pêvînayîşê peyîn de zî bi asansore ardî. Di gardiyanan hetkarî kerdî û ardî. Êdî nêeşkena rayîra şêro. Sey verê nêeşkena qisey bikero. Baş nêeşnawena. Menge ra di rey benê nêweşxane. Wexto ke berdê leşkeran waştê aye kelepçe bikerê. Aye zî qebûl nêkerdo, şer kerdê. Tewr peyîn fek ci ra vera dayê. Ganî emeliyat biba û bi diyalîz bêra girêdayene. La maya mi nêwazena zindan de emelîyat biba. Seba aye çîyêk bêro kerdene. Ma bi desan rey seba serbest veradayîşî muracat kerd la qebûl nêkerdî.