ÊLIH - Teşebusê Pawitişê Hesenkeyfî seba xelasîya Hesenkeyfî û Newala Dîcle veng da rayapêroyîye ke vengê xo bikerê berz.

 

Teşebusê Pawitişê Hesenkeyfî derheqê halo peyên ê Awbendê Ilisû û Hesenkeyfî de eşkerayîyêk daye çapemenîye. Eşkerayîya ke bi sernameyê “Seba Hesenkeyfî erey mekewe! Awbendê Ilisûyî tavilî vindarnê” ameye dayene de qalê muhîmîya tarîxî û kulturkî ya Hesenkeyfî ame kerdene.

 

Teşebusî vat, ê kenê ke Hesenkeyfî fedayê Awbendê Ilisûyî û projeyê Santralê Hîdro Elektrîkî (HES) bikerê, emrê projeyê awbendî 50 serrî yo û ame vatene, “Projeyê Ilisûyî k ever bi qedînayîşî yo, bê vînayîşê peymananê neteweyîyan û mîyanneteweyîyan ameyo amadekerdene. Raporê ci yê Ercnayîşê Tesîrê Dormeyî zî çino.”

 

'Bikewê mîyanê tevgerî'

 

Eşkerayîye de bêxemîya UNESCO û Mehkemeya Heqanê Merdiman a Ewropa zî amî vîrvistene û ame vatene ke her di sazîyî bîyê hemparê sûcê qirkerdişê kulturkîyî. Peynîya eşkerayîye de veng dîya rayapêroyî ya demokratîke ke seba xelesnayîşê Hesenkeyfî û Newala Dîcle bê ke erey bikewê tê bigêrê.