MÊRDÎN - Keyeyê hepsîyan, dimayê grevê vêşanîye ke bi vengdayîşê Rayberê PKKyî Abdullah Ocalanî dir peynî bî, şî zindanê Tîpê E yê Mêrdînî wina vatî: "Moral û rîyê înan bi huyayîş gerek biameyne vînayîş. Vatî 'ma pîya xo ver da, ma pîya qezenc kerd’.”

 

Çalakîyê grevê vêşanîye ya bi rayberîya Kongera Komeleyê Demokratîk (KCD) û parlamentera Partîya Demokratîk ya Şaran (HDP) ya Colemêrgî Leyla Guvene ke bi amancê wedartişê tecrîdê serê Rayberê PKKyî Abdullah Ocalan, 7 aşmî verê ame destpêkerdiş û pêro zindanan de vila bî. Yewşeme yê vîyarte de vengdayîşê Rayberê PKKyî Abdullah Ocalanî çalakî ame peynîkerdiş. Hepsîyê Tîpê E yê Mêrdînî ke dimayê grev bi keyeyê xo dir ameyî têhet, dîyar kerdî ke înan pîya xo ver dayo û pîya qezenc kerdo.

 

Fevzîye Kaya da zanayîş ke moralê hepsîyan zaf baş bîyo û lajê aye Neçîrvan Kaya zî 1ê adare de dest bi grev kerdib û wina va: "1ê adare de kewtib grev. Rewşa înan baş bî. Rîyê înan gane bibi. Doktor şî bî verê înan, tahlîl kerdibî û lîsteyê werdî dabî. Rîyê pêrune huyayne. Moralê înan baş bi. Weşîya înan do roj bi roje baş bibo. Ma umîd kenê do rewşa înan baş bibo. Heta no moral înan dir bibo, do pêro çî derbaz bibê."

 

'Ma bi kêfweş ê' 

 

Fevzîye va nê prosesî de lajê aye 10 kîlo û aye zî 7 kîlo daya û wina va: "Prosesê grevî de ma nêeşkayne werd biwerdêne. Mi zî xo grev de hîs kerdêne. Nika qet nêbo ma rehet ê, ma bi domanê xo dir eşkenê bi rehetî çîyêk biwerê."

 

Hatîce Ayave zî da zanayîş ke lajê aye Serkan Ayavî 1ê adare de kewto grev û wina va: "Rewşa înan baş bî. Îradeyê înan zaf o. Lajê mi nêweş bi, brîndar bi, la reyna zî grev ra nêvejîya. Netîceyê ke ameyo girewtiş, seba şarê Kurd zaf baş bi. Ma rojê zehmet derbaz kerd. Ê rojan de hepsîyan moral da ma. La nika ma rîyê înan bi huyayîş vînenê û ma kêfweş benê. Ma şî pêvînayîş. Hepsîyan va, 'Ma pîya xo ver da, ma pîya qezenc kerd.' Ma nika  bi hawayêke rehet rakonê."